Бугун,

  • USD 10940.05
  • RUB 182.26
  • EUR 11121.65

Андижон вилоятида сўнгги икки йил давомида 17 миллиард сўмдан ортиқ бюджет маблағлари талон-торож қилингани аниқланиб, бунинг учун 30 нафар мансабдор шахс жиноий жавобгарликка тортилган. Бу ҳақда «Дарё» мухбири Умиджон Мамарасулов хабар берди.

Ғайрат Фозилов.

Ғайрат Фозилов.
Фото: «Дарё»

Маълум бўлишича, 2020 йил 23 ноябрь куни вилоят ҳокимлигида ўтказилган идоралараро йиғилишда вилоят прокурори Ғайрат Фозиловнинг ахбороти тингланган. Унда айрим ташкилот ва идораларда коррупцион қонун бузилишлар, порахўрлик ва ўз шахсий манфаатини устун қўйиб, берилган ишончни суиистеъмол қилиш ҳолатлари учраётганлиги таъкидланган.

Вилоят прокурорининг айтишича, сўнгги икки йил давомида вилоят бўйича 139 нафар мансабдор турли кўринишдаги коррупцион жиноятларни содир этганлиги учун жавобгарликка тортилган. Бундай жиноятлар оқибатида эса етказилган моддий зарар миқдори 18 миллиард сўмдан ошган.

«Иқтисодий соҳадаги коррупция ҳақида сўз юритганда, аввало, бюджет маблағларидан мақсадли ва оқилона фойдаланиш йил сайин долзарб муаммога айланиб бораётганлигини ташвиш билан таъкидламоқчиман. Zero, таҳлиллар энг қуйи поғонадан тортиб то юқоригача бюджет пулларини талон-торож қилишнинг турли коррупциявий схемалари кенг илдиз отганлигини кўрсатмоқда. Аҳамият беринг, сўнгги икки йилда вилоят бўйича 17 миллиард сўмдан ортиқ бюджет маблағларини талон-торож қилиш ҳолатлари аниқланиб, бу қилмишлари учун 30 нафар шахс жиноий жавобгарликка тортилган. Бундай ҳолатлар, асосан, қурилиш, банк, энергетика соҳаларига тўғри келади. Ҳудудлар кесимида оладиган бўлсак, иқтисодий жиноятларнинг 90 фоизга яқини Андижон шаҳри (16,4 млрд)да қайд қилинган. Шунингдек, Хўжаобод (61,5 млн), Асака (162,8 млн), Жалақудуқ (724 млн), Марҳамат (287 млн), Олтинкўл (135 млн), Булоқбоши (137 млн) туманларида шу каби жиноятларнинг ортганини кузатишимиз мумкин», — деди вилоят прокурори Ғайрат Фозилов.

Фото: «Дарё»

Фозилов бюджет маблағларининг рационал тақсимланиши ва мақсадли ишлатилиши юзасидан давлат назоратига масъул молия органлари ўзига юклатилган вазифаларни талаб даражасида бажармаётганлигини ҳам айтиб ўтган. Унинг айтишича, 2019—2020 йиллар давомида ҳуқуқни муҳофаза қилувчи органлар ташаббуси билан ўтказилган текширишлар натижасида 17,3 миллиард сўмлик талон-торожликлар фош этилган бир пайтда давлат молиявий назорати вилоят бошқармаси ташаббуси билан 4,8 миллиард сўмлик талон-торож қилиш ҳолати аниқланган.

Эслатиб ўтамиз, аввалроқ 2020 йилнинг 9 ойи давомида ҳуқуқни муҳофаза қилувчи органлар томонидан жами 838 та коррупция ҳолати юзасидан жиноят ишлари қўзғатилгани хабар берилганди.

Изоҳ
Асосий янгиликлар