Тошкент шаҳрида 18 ноябрь куни фоҳишалик билан шуғулланувчи гуруҳни интернетда реклама қилиб келган блогер қўлга олинди, дея хабар бермоқда Тошкент вилояти ИИББ.
Фото: Тошкент вилояти ИИББ
Маълум қилинишича, Тошкент вилояти Прокуратураси, ИИББ Терроризм ва диний экстримизмга қарши курашиш бошқармаси ходимлари томонидан 18 ноябрь куни тезкор тадбир ўтказган. Олиб борилган суриштирувлар давомида ўзини Рома деб таништирувчи ушбу шахс 1988 йилда туғилган Яшнобод туманида яшовчи Т.М. эканлиги, фоҳишахона сақлаш, қўшмачилик қилиш ва одам савдоси каби жиноий фаолият билан шуғулланувчи гуруҳнинг фаол аъзоси экани аниқланган.
Шунингдек, суруштирув давомида у моддий (ҳар бир эълон учун 50 дан 500 долларгача) даромад эвазига жинсий хизмат кўрсатувчи фоҳишаларнинг массаж ва интим хизмати эълонларини ижтимоий тармоқларга мунтазам равишда жойлаб келганлиги аниқланиб, унинг яшаш хонадони тинтувдан ўтказилган.
Тинтув давомида:
- 29 минг 14 доллар;
- 4 миллион 880 минг сўм пул;
- 10 дона пластик карточка;
- 2 дона чегирма пластик карточкаси;
- 4 дона хорижий давлатларнинг ишлатилмаган ва 2 дона ишлатилган СИМ-карталар;
- 2 дона электрон хотира (флеш карта);
- 3 дона Redmi русумли телефон аппарати;
- 1 дона HP ноутбук ва бошқа ноқонуний буюмлар ашёвий далил сифатида олинган.
Фото: Тошкент вилояти ИИББ
Ҳозирда мазкур ҳолат юзасидан вилоят ИИББ ходимлари томонидан тезкор суриштирув ҳаракатлари олиб борилмоқда.
Аввалроқ Тошкентда Ўзбекистон ва чет эл фуқароларига шаҳвоний хизматлар кўрсатувчи йирик жиноий гуруҳ аниқлангани, Самарқандда 12 нафар фуқаронинг паспортини олиб қўйиб, уларни 2 йил давомида фоҳишалик билан шуғулланишга мажбур қилган аёл ҳибсга олингани ҳамда Наманганда ОИТСга чалинганини била туриб, эркаклар билан ишқий муносабатда бўлган аёлга жиноий иш қўзғатилмагани ҳақида хабар қилинганди.
