Ҳашаматли Mercedes S-Class тақдим этилди (фото)

Mercedes-Benz компанияси S-Class Maybach седанининг янги авлодини тақдим этди, деб хабар беради «Quto.ru».

Марканинг флагман модели ўзидан олдинги аждодидан 180 миллиметрга узунроқ: эндиликда унинг узунлиги 5469 миллиметрни, ғилдираклар базаси 3396 миллиметрни ташкил этади. Энг қиммат версияни «кичкина»лардан бампер ва радиатор панжарасининг узунлиги, 19-21 дюймли оригинал ғилдирак дискалари, узунроқ орқа эшиги ва орқа томонидаги ёритиладиган эмблемалари орқали фарқлаб олиш мумкин.

Янги модель 503 от кучи ва 700 Нм айланувчи моментга эга тўрт литрли V8 «юмшоқ гибриди» ва қисқа вақт ичида қувватни 22 от кучига (250 Нм) оширувчи EQ Boost «стартёр-генератори» ёрдамида ҳаракатга келади. У ўн поғонали автомат узатмалар қутиси ва тўлиқ узатмалар тизими ёрдамида бошқарилади. Лимузиннинг максимал тезлиги 210 км/соатга етади.

Оддий S-Class опсиялари билан бирга модель тўлиқ бошқарилувчи шасси, салонининг ичида бешта монитор, қўшимча реаллик технологиясига эга проекцион дисплей, овозли ёрдамчи, орқа ўриндиқдаги йўловчилар учун хавфсизлик ёстиқчаси каби қўшимга опсияларга эга бўлган.

Ишлаб чиқарувчи Mercedes-Maybach S-Class’нинг асосий рақиби сифатида Bentley Flying Spur ва Rolls-Royce Ghost Extended’ни кўрсатмоқда.