Бугун,

  • USD 11014.01
  • RUB 191.8
  • EUR 10674.78

Қорақалпоғистоннинг Нукус шаҳрида яшовчи ота собиқ турмушидан бўлган 3 фарзанди учун алимент ўрнига уй ҳадя қилди, дея хабар бермоқда Мажбурий ижро бюроси «Дарё»га.

Нукус туманлараро фуқаролик ишлари бўйича суди 2018 йил 28 июлда қарздор М.У.дан даъвогар Г.Жумашеванинг фойдасига 3 фарзандининг моддий таъминоти учун қарздорнинг ҳар ойдаги даромадининг ярми миқдорида алимент нафақаси ундиришни белгилаган бўлиб, мазкур ижро ҳужжати Мажбурий ижро бюроси Нукус шаҳар бўлими иш юритувига 2018 йил 16 июлда келиб тушган ва ижро иши юритуви қўзғатилган.

Мажбурий ижро ҳаракатлари давомида бўлим давлат ижрочилари томонидан бир неча бор огоҳлантирилганига қарамасдан, қарздор ота алимент нафақасини қасддан тўламай келган ва оқибатда 2018 йил 28 июндан 2019 йил 11 январь оралиғидаги давр учун қарздорлик 18 миллион 149,9 минг сўмни ташкил қилган.

Шу боис бўлим томонидан мазкур ижро ҳужжати юзасидан тегишли ҳужжатлар тўпланган ҳолда Нукус шаҳар маъмурий судига юборилган ва 2019 йил 4 декабрда бўлиб ўтган мажлисда суд томонидан қарздор отага 15 кунлик маъмурий қамоқ жазоси тайинланган.

Бундан кейин ҳам тегишли хулоса чиқармаган ота алимент нафақасини тўлашдан бўйин товлаб келгани оқибатида 2020 йилнинг октябрь ойи ҳолатига қарздорлик 33 миллион 151,4 минг сўмдан ошиб кетган.

Шундан кейин бўлим давлат ижрочилари томонидан қарздорга келиб чиқиши мумкин бўлган ҳуқуқий оқибатлар тушунтирилганда қарздор ота ўз номидаги уйини бериш истагини билдирди.

Натижада собиқ турмуш ўртоқлар ўзаро келишиб, алиментчи ота Нукус шаҳри ҳудудида жойлашган уй ҳовлисини собиқ турмуш ўртоғи номига расмийлаштириб берди ва мазкур ижро ҳужжати тегишли тартибда тамомланди.

Аввалроқ Бекободлик ота 3 нафар фарзанди учун қарийб 134 миллион сўм алимент пулини олдиндан тўлагани, Тошкент шаҳрида ота қарийб 430 миллион сўмлик алимент пулини биратўла тўлаб бергани ҳамда Андижонлик ота фарзандларига алимент пуллари ўрнига уй совға қилгани ҳақида хабар берилганди.

Изоҳ
Асосий янгиликлар