Украинанинг дори ишлаб чиқарувчи йирик корхонаси «Фармак» 2024 йилда Ўзбекистондаги Tashkent Pharma Park фармацевтика кластерида қаттиқ дозалаш шаклларини ишлаб чиқариш заводини ишга туширишни режалаштирмоқда. Бу ҳақда «Фармак»нинг МДҲ мамлакатларидаги маркетинг ва сотувлар бўйича директори Антон Зубов маълум қилди, деб ёзмоқда Spot.
«Афсуски, пандемия туфайли кўплаб масалалар биз кутганимиздан анча секин ҳал қилинмоқда, аммо биз компания учун муҳим бўлган ушбу лойиҳада изчил олдинлаймиз», — деди Зубов.
Унинг сўзларига кўра, Ўзбекистон МДҲ ҳудудида компания учун энг катта ва энг муваффақиятли бозор ҳисобланади — бутун минтақадаги сотувларнинг ярмидан кўпи Ўзбекистон ҳиссасига тўғри келади. Ундан кейин Қозоғистон, Беларусь ва Қирғизистон. Зубов «Фармак»нинг Ўзбекистон бозоридаги улушини 2,8 фоизга баҳолаб, буни рекорд даража деб атади.
«Фармак» Ўзбекистонда ишлаб чиқариш объекти қурилишига 10 миллион доллар сармоя киритиши ҳақида 2018 йилда маълум бўлган. Ўша йили «Фармак» вакиллари компания ҳар йили Ўзбекистонга 20 миллион долларлик маҳсулот экспорт қилаётгани ҳақида хабар берган.
Изоҳ (0)