Андижон вилояти Пахтаобод туманида вояга етмаган ва ногирон 16 ёшли қизни зўрлаб келган 65 ёшли эркакка нисбатан жиноят иши қўзғатилди. Бу ҳақда вилояти ИИБ ахборот хизмати хабар берди.
Sputnik’нинг ёзишича, қиз II-гуруҳ ногиронлиги бўйича рўйхатда туради ва ўз тенгдошларига нисбатан ақлан заифроқ. Шу боис у ўз вақтида ўзи билан юз берган ҳолатларни англай олмаган. Қиз онасининг сўзларига кўра, ушбу ҳодиса бир неча маротаба содир бўлган.
Жабрланувчининг онаси маълум қилишича, у қизининг илмга чанқоқлигини кўриб, одамларга қўшилсин, деган мақсадда мактабда ўқитишга қарор қилган. Пандемия вақтида онлайн тарзда ўқиши учун унга планшет сотиб олиб берган.
Интернетдан фойдаланиш давомида қиз тасодифан порнографик видеороликка гувоҳ бўлган ва уни онасига кўрсатиб, «Бу бахтли ҳаёт, фалончи амаки айтди...» дея ўзи ва қўшниси ўртасида юз берган ҳолатлар ҳақида айтиб берган. Она илк маротаба шунда қизи 65 ёшли қўшниси томонидан зўрланаётганлигини билиб қолган.
«Қайнотам ‘Келин, бир умр ногирон боқиб, уйда ўтириб қолдингиз. Сиз ҳам бундоқ ишга чиқиб одамларга қўшилин’ деганлиги учун тумандаги тикув фабрикасига ишга жойлашган эдим. Пандемия вақтида уйимиз деразаларини михлаб қўйган эдик. Қўшни ўзининг ғаразли мақсадига етиш учун ана шу михларни суғуриб, деразадан тушган ва ҳар гал шу дераза орқали уйга кириб турган. Қизимни эса ‘Онангга айтма, бахтли бўласан, қизим, ногирон бўлганинг учун сенга бу ҳақда гапиришмаган, аслида ҳамма шундай қилиб, эрга тегади’ каби сўзлар билан алдаб келган. Оғриқни қолдириш мақсадида ёки ҳомиладор бўлиб қолмаслиги учунми, ‘грипп бўлмайсан’ деб қизимга аллақандай дорилар ичириб келган», – дейди қизнинг онаси.
Она айрим сабабларга кўра қизи охирги маротаба зўрланганидан бир ой ўтиб, туман ИИБга мурожаат қилган. Бироқ иш қизнинг ўз хоҳишига кўра юз бериб келганлиги важи билан тугатилган.
Андижон вилояти ИИБнинг маълум қилишича, 26 сентябрь куни Пахтаобод туманида яшовчи фуқаро К.И. туман ИИБ бошлиғи номига ариза билан мурожаат қилиб, ўз аризасида қўшниси Ю.Ф. вояга етмаган қизи билан 3-4 ойдан буён жинсий алоқада бўлиб, унга нисбатан уятсиз, бузуқ ҳаракатлар содир этганлигини маълум қилган ва Ю.Ф.га нисбатан қонуний чора кўриб беришни сўраган.
Ушбу мурожаат шу куни Пахтаобод тумани ИИБ навбатчилик қисми томонидан рўйхатдан ўтказилиб, туман тергов бўлими томонидан терговга қадар текширув ҳаракатлари олиб борилган. Тергов ҳаракатлари жараёнида судга оид тиббий, физика-техника ва психиатрия экспертизалари ўтказилган. Текширув ҳаракатлари якунига кўра, фуқаро Ю.Ф. вояга етмаган М.А. билан 2018 йилдан буён, унинг 16 ёшга тўлмаганлигини англаган ҳолда жинсий алоқа қилиб келганлиги аниқланган.
Мазкур ҳолат юзасидан Пахтаобод тумани ИИБ ҳузуридаги тергов бўлими томонидан 4 ноябрь куни фуқаро Ю.Ф.га нисбатан Жиноят кодексининг 128-моддаси (ўн олти ёшга тўлмаган шахс билан жинсий алоқа қилиш) 1-қисми билан жиноят иши қўзғатилиб, ҳозирда тергов ҳаракатлари давом эттирилмоқда.
Эслатиб ўтамиз, аввалроқ сирдарёлик эркак мактаб ҳожатхонасида 8 ёшли қизга нисбатан ахлоқсиз ҳаракатларни амалга оширгани маълум бўлганди. Ҳолат юзасидан терговга қадар текширув ҳаракатлари олиб борилиб, муқаддам судланган эркак содир этганлиги аниқланган. Унга нисбатан, 14 август куни жиноят иши қўзғатилган.
Изоҳ (0)