Andijon viloyati Paxtaobod tumanida voyaga yetmagan va nogiron 16 yoshli qizni zo‘rlab kelgan 65 yoshli erkakka nisbatan jinoyat ishi qo‘zg‘atildi. Bu haqda viloyati IIB axborot xizmati xabar berdi.
Sputnik’ning yozishicha, qiz II-guruh nogironligi bo‘yicha ro‘yxatda turadi va o‘z tengdoshlariga nisbatan aqlan zaifroq. Shu bois u o‘z vaqtida o‘zi bilan yuz bergan holatlarni anglay olmagan. Qiz onasining so‘zlariga ko‘ra, ushbu hodisa bir necha marotaba sodir bo‘lgan.
Jabrlanuvchining onasi ma’lum qilishicha, u qizining ilmga chanqoqligini ko‘rib, odamlarga qo‘shilsin degan maqsadda maktabda o‘qitishga qaror qilgan. Pandemiya vaqtida onlayn tarzda o‘qishi uchun unga planshet sotib olib bergan.
Internetdan foydalanish davomida qiz tasodifan pornografik videorolikka guvoh bo‘lgan va uni onasiga ko‘rsatib, “Bu baxtli hayot, falonchi amaki aytdi...” deya o‘zi va qo‘shnisi o‘rtasida yuz bergan holatlar haqida aytib bergan. Ona ilk marotaba shunda qizi 65 yoshli qo‘shnisi tomonidan zo‘rlanayotganligini bilib qolgan.
“Qaynotam ‘Kelin, bir umr nogiron boqib, uyda o‘tirib qoldingiz. Siz ham bundoq ishga chiqib odamlarga qo‘shiling’ deganligi uchun tumandagi tikuv fabrikasiga ishga joylashgan edim. Pandemiya vaqtida uyimiz derazalarini mixlab qo‘ygan edik. Qo‘shni o‘zining g‘arazli maqsadiga yetish uchun ana shu mixlarni sug‘urib, derazadan tushgan va har gal shu deraza orqali uyga kirib turgan. Qizimni esa ‘Onangga aytma, baxtli bo‘lasan, qizim, nogiron bo‘lganing uchun senga bu haqda gapirishmagan, aslida hamma shunday qilib, erga tegadi’ kabi so‘zlar bilan aldab kelgan. Og‘riqni qoldirish maqsadida yoki homilador bo‘lib qolmasligi uchunmi, ‘gripp bo‘lmaysan’ deb qizimga allaqanday dorilar ichirib kelgan”, – deydi qizning onasi.
Ona ayrim sabablarga ko‘ra qizi oxirgi marotaba zo‘rlanganidan bir oy o‘tib, tuman IIBga murojaat qilgan. Biroq ish qizning o‘z xohishiga ko‘ra yuz berib kelganligi vaji bilan tugatilgan.
Andijon viloyati IIBning ma’lum qilishicha, 26-sentabr kuni Paxtaobod tumanida yashovchi fuqaro K.I. tuman IIB boshlig‘i nomiga ariza bilan murojaat qilib, o‘z arizasida qo‘shnisi Yu.F. voyaga yetmagan qizi bilan 3-4 oydan buyon jinsiy aloqada bo‘lib, unga nisbatan uyatsiz, buzuq harakatlar sodir etganligini ma’lum qilgan va Yu.F.ga nisbatan qonuniy chora ko‘rib berishni so‘ragan.
Ushbu murojaat shu kuni Paxtaobod tumani IIB navbatchilik qismi tomonidan ro‘yxatdan o‘tkazilib, tuman tergov bo‘limi tomonidan tergovga qadar tekshiruv harakatlari olib borilgan. Tergov harakatlari jarayonida sudga oid tibbiy, fizika-texnika va psixiatriya ekspertizalari o‘tkazilgan. Tekshiruv harakatlari yakuniga ko‘ra, fuqaro Yu.F. voyaga yetmagan M.A. bilan 2018-yildan buyon, uning 16 yoshga to‘lmaganligini anglagan holda jinsiy aloqa qilib kelganligi aniqlangan.
Mazkur holat yuzasidan Paxtaobod tumani IIB huzuridagi tergov bo‘limi tomonidan 4-noyabr kuni fuqaro Yu.F.ga nisbatan Jinoyat kodeksining 128-moddasi (o‘n olti yoshga to‘lmagan shaxs bilan jinsiy aloqa qilish) 1-qismi bilan jinoyat ishi qo‘zg‘atilib, hozirda tergov harakatlari davom ettirilmoqda.
Eslatib o‘tamiz, avvalroq sirdaryolik erkak maktab hojatxonasida 8 yoshli qizga nisbatan axloqsiz harakatlarni amalga oshirgani ma’lum bo‘lgandi. Holat yuzasidan tergovga qadar tekshiruv harakatlari olib borilib, muqaddam sudlangan erkak sodir etganligi aniqlangan. Unga nisbatan, 14-avgust kuni jinoyat ishi qo‘zg‘atilgan.
Izoh (0)