Сурхондарё вилояти прокуратураси бўлим катта прокурори Б.Эргашев тепловоз иштирокидаги йўл-транспорт ҳодисаси қурбони бўлди, бахтсиз ҳодиса туфайли вилоят прокурори ўринбосари Х.Куллиев тан жароҳати олди, дея хабар бермоқда Бош прокуратура «Дарё»га.
Маълум қилинишича, 2020 йил 7 ноябрь соат 21:30 ларда Сурхондарё вилояти прокуратураси ҳайдовчиси Ў.Каттаев давлат рақами 75 704 ZDF бўлган Lacetti русумли хизмат автомашинасида Термиз туманидан Термиз шаҳри томонга ҳаракатланиб келаётган бўлган.
Автомобиль Термиз тумани ҳудудидан ўтувчи 4К-599 Намуна–Учқизил автомобиль йўлининг 3-километрида Термиз–Учқизил темир йўл бекатлари оралиғининг 57-километрининг 9-пикетида жойлашган қўриқланмайдиган темир йўл кесишмасидан ўтаётган вақтида эҳтиётсизлик оқибатида Термиз–Учқизил йўналиши бўйича ҳаракатланиб келаётган резерв тепловоз билан тўқнашиб, йўл-транспорт ҳодисаси содир этган.
Бахтсиз ҳодиса оқибатида Ў.Каттаев ҳамда автомашина олд ўриндиғида бўлган вилоят прокуратураси бўлими катта прокурори Б.Эргашев ҳодиса жойида вафот этган.
Шунингдек, автомашина орқа ўриндиғида бўлган вилоят прокурорининг ўринбосари Х.Куллиев тан жароҳатлари билан шифохонага ётқизилган.
Сурхондарё вилояти прокуратураси томонидан 8 ноябрь куни Жиноят кодексининг 266-моддаси 3-қисми «а» банди (одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Аввалроқ Қашқадарёда ҳайдовчининг ухлаб қолиши оқибатида Matiz Nexia билан тўқнашгани, Тиcо ҳамда Lada иштирокида ЙТҲда ҳайдовчи вафот этгани ҳамда Пастдарғомда Cobalt ҳамда Nexia иштирокидаги ЙТҲда ҳайдовчилардан бири вафот этгани ҳақида хабар берилганди.
Изоҳ (0)