Surxondaryo viloyati prokuraturasi bo‘lim katta prokurori B.Ergashev teplovoz ishtirokidagi yo‘l-transport hodisasi qurboni bo‘ldi, baxtsiz hodisa tufayli viloyat prokurori o‘rinbosari X.Kulliyev tan jarohati oldi, deya xabar bermoqda Bosh prokuratura “Daryo”ga.
Ma’lum qilinishicha, 2020-yil 7-noyabr soat 21:30 larda Surxondaryo viloyati prokuraturasi haydovchisi O‘.Kattayev davlat raqami 75 704 ZDF bo‘lgan Lacetti rusumli xizmat avtomashinasida Termiz tumanidan Termiz shahri tomonga harakatlanib kelayotgan bo‘lgan.
Avtomobil Termiz tumani hududidan o‘tuvchi 4K-599 Namuna–Uchqizil avtomobil yo‘lining 3-kilometrida Termiz–Uchqizil temir yo‘l bekatlari oralig‘ining 57-kilometrining 9-piketida joylashgan qo‘riqlanmaydigan temiryo‘l kesishmasidan o‘tayotgan vaqtida ehtiyotsizlik oqibatida Termiz–Uchqizil yo‘nalishi bo‘yicha harakatlanib kelayotgan rezerv teplovoz bilan to‘qnashib, yo‘l-transport hodisasi sodir etgan.
Baxtsiz hodisa oqibatida O‘.Kattayev hamda avtomashina old o‘rindig‘ida bo‘lgan viloyat prokuraturasi bo‘limi katta prokurori B.Ergashev hodisa joyida vafot etgan.
Shuningdek, avtomashina orqa o‘rindig‘ida bo‘lgan viloyat prokurorining o‘rinbosari X.Kulliyev tan jarohatlari bilan shifoxonaga yotqizilgan.
Surxondaryo viloyati prokuraturasi tomonidan 8-noyabr kuni Jinoyat kodeksining 266-moddasi 3-qismi “a” bandi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Avvalroq Qashqadaryoda haydovchining uxlab qolishi oqibatida Matiz Nexia bilan to‘qnashgani, Tico hamda Lada ishtirokida YTHda haydovchi vafot etgani hamda Pastdarg‘omda Cobalt hamda Nexia ishtirokidagi YTHda haydovchilardan biri vafot etgani haqida xabar berilgandi.
Izoh (0)