«Юра даври дунёси 3» фильмининг суратга олиш ишлари якунланди. Картина якунига қадар 40 000 та COVID-19 тести ўтказилди

Буюк Британияда «Юра даври дунёси»нинг учинчи қисмини суратга олиш ишлари якунланди. Бу ҳақда «Кинопоиск» хабар беради.

«Юра даври дунёси 3» COVID-19 пандемияси туфайли узоқ танаффусдан сўнг суратга олиш ишларини давом эттирган биринчи фильм ҳисобланади. Фильм режиссёри Колин Треворроу сўзларига кўра, Universal компанияси профилактика чоралари билан шуғулланиш учун хусусий соғлиқни сақлаш ташкилотини ёллаган. У суратга олиш майдончасида 40 мингдан ортиқ тестларни ўтказган, уларнинг юзга яқини ижобий, баъзилари эса нотўғри натижани қайд этган. Шунингдек, суратга олиш майдончасига киришдан аввал барчанинг тана ҳарорати ўлчанган.

Хавфсизлик чораларини ташкил этиш ҳаммаси бўлиб Universal’га 6-8 миллион долларга тушди. Ушбу миқдор актёрлар ва суратга олиш гуруҳи учун махсус ажратилган меҳмонхонани ҳам ўз ичига олади. «Биз бирга яшадик, овқатландик, ҳикоялар айтдик, қўрқув ва умидлар билан бўлишдик, майсазорда учар диск ўйнадик. Завқланиш учун сабаб топиш қийин бўлган бир пайтда биз жуда кўп хурсандчиликлар қилдик, − дейди фильм режиссёри Треворроу. – Биз севганларимизга иложи борича яқин бўлиш керак бўлган вақтда улардан узоқда эдик».

Режиссёрнинг фикрига кўра, изоляция тажрибаси фильмни яхшилашга ёрдам беради, сабаби актёрлар бу пайтда бир-бирига жуда яқинлашган эди. «Дам олиш кунлари машқ қилдик, қаҳрамонлар устида ишладик, бу эса фильмни ҳиссий жиҳатдан анча ёрқинроқ қилади. Шунингдек, Треворроу ушбу картинани коронавирус даврида долзарб бўлиб қолишини таъкидлади: «Бу картина биргаликда яшаш ва омон қолиш зарурлиги ҳақидаги фильм. Агар пандемия бизга ниманидир ўргата олган бўлса, демак, турли авлодлар бир-бирларини ҳимоя қилиши керак».

Бундан ташқари, режиссёр фильмнинг кинотеатрларда намойиш этилишига умид қилаётганини ҳам қўшимча қилди. Фильм премьераси 2022 йил 10 июнда бўлиб ўтиши режалаштирилган.