Бирлашган Араб Амирликлари ҳамда Ўзбекистон Транспорт вазирлиги ўртасидаги ҳаво қатнови бўйича келишувига мувофиқ БААнинг Air Arabia авиакомпанияси Шаржа—Тошкент—Шаржа йўналишларида мунтазам авиақатновларни йўлга қўйди. Бу ҳақда ЎзА хабар берди.
Маълум қилинишича, 4 ноябрь соат 19:00 да Ислом Каримов номидаги Тошкент халқаро аэропортига мазкур авиакомпаниянинг илк самолёти келиб қўнди.
Air Arabia авиакомпанияси Ўзбекистонга ўз парвозларини Airbus-320-214 ва Airbus-321-251NХ ҳаво кемаларида амалга оширади. Airbus-321-251NХ самолёти бир томонга 150-200 йўловчи ташийди. Парвозларни ҳафтасига икки марта амалга ошириш режалаштирилган бўлиб, уларнинг давомийлиги 4,5-5 соатни ташкил этади.
Air Arabia авиакомпанияси Абу-Даби—Тошкент—Абу-Даби йўналиши бўйича ҳам Ўзбекистонга парвозларни амалга ошириш юзасидан келишувга эришиш ниятини билдирди.
Эслатиб ўтамиз, Air Arabia Ўзбекистонга мунтазам парвозларни амалга ошириш учун 2020 йилнинг сентябрь ойида рухсатнома олганди.
Маълумот учун, Air Arabia Бирлашган Араб Амирликларининг лоукостер авиакомпанияси ҳисобланади. Бош қароргоҳи Шаржа шаҳрида жойлашган. Йўловчи ташиш бўйича дунёнинг 89 мамлакатига 170 йўналишда ўз парвозларини амалга ошириб келади.
Изоҳ (0)