O‘zbekiston hududidagi magistral gaz quvurlari himoya zonasida 2 ming 425 ta noqonuniy qurilmalar aniqlandi. Bu haqda Sanoat xavfsizligi davlat qo‘mitasi axborot xizmati “Daryo”ga ma’lum qildi.
Qo‘mita tomonidan berilgan ma’lumotga ko‘ra, tabiiy gaz quvurlari tizimining holati va ushbu sohaga oid qonun hujjatlarining ijro etilishi yuzasidan o‘rganishlar olib borilgan. O‘rganishlar natijasida
- Buxoro viloyatida 573 ta,
- Toshkent viloyatida 354 ta,
- Jizzax viloyatida 348 ta,
- Samarqand viloyatida 248 ta,
- Sirdaryo viloyatida 185 ta,
- Surxondaryo viloyatida 178 ta,
- Navoiy viloyatida 172 ta,
- Qoraqalpog‘istonda 137 ta,
- Namangan viloyatida 87 ta,
- Farg‘ona viloyatida 82 ta,
- Qashqadaryo viloyatida 30 ta,
- Andijon viloyatida 29 ta,
- Xorazm viloyatida 3 ta noqonuniy qurilmalar aniqlangan. Bu o‘tgan 2019-yilga nisbatan 312 taga ko‘p.
“Aniqlangan noqonuniy qurilmalarni buzish yoki boshqa joylarga ko‘chirish bo‘yicha sud organlariga o‘rnatilgan tartibda da’vo arizalarini taqdim etish va ularni tahlil qilib borish ishlari “O‘ztransgaz” AJ tomonidan sust olib borilyapti. Shuningdek, ogohlantirishlarga qaramasdan Buxoro va Navoiy viloyatlaridagi magistral gaz quvurlari himoya zonasidagi 20 dan ortiq noqonuniy qurilmalarga kadastr idoralari tomonidan kadastr hujjatlari rasmiylashtirilganligi holatlari ham aniqlandi”, — deyiladi qo‘mita axborotida.
Qoidaga ko‘ra, magistral gaz quvurlari metallining fizik-kimyoviy holatini zarur darajada saqlash va ularning xavfsiz ekspluatatsiyasini ta’minlash uchun magistral gaz quvurlarida elektrokimyoviy himoya stansiyalari bo‘lishi zarur. Magistral gaz quvurlarining loyihalarida ko‘zda tutilgan 2 ming 340 ta elektrokimyoviy himoya stansiyalaridan, bugungi kunda amalda 1 ming 478 tasi ishchi holatda. Elektrokimyoviy himoya stansiyalarining 952 tasi belgilangan talablarga javob bermaganligi va ularda ta’mirlash ishlarini bajarilmagani, zarur ehtiyot qismlar bilan ta’minlamaganligi sababli ishsiz holatda.
Izoh (0)