Танасини 63 кг тирик асаларилар билан қоплаган хитойлик эркак Гиннеснинг рекордлар китобига киритилди (видео)

Хитойнинг Ичун шаҳрида 63 килограмм оғирликдаги тирик асаларилар билан қопланган киши Гиннеснинг рекордлар китобига киритилди. Ушбу воқеа Video Guinnes World Records’нинг Facebook саҳифасига жойлаштирилди.

Жуан Лянмин танасидаги асаларилар тўдаси билан жаҳон рекордини ўрнатди. Тасвирда ҳашаротлар уюми ҳимоя кийимларисиз бўлган хитойлик эркакка ёпишгани акс этган. Бутунлай асалари билан қопланган Лянмин худди жигарранг ҳайкалга ўхшаб қолган. Видеонинг сўнгги дақиқаларидагина Лянмин юзидаги ҳашаротларни тозалаш учун бошини силкитганини кўриш мумкин.

Рекордлар китоби вакиллари эркакни кузатиб борди ва натижа қайд этилгач махсус тайёргарлик кўрган одамлар уни асаларидан халос этди.

Шунингдек, видео 6 миллиондан кўпроқ томоша қилинган ва фойдаланувчилар томонидан улашилган. «Бундай истеъдод эгасини биринчи марта кўришим. Видеони қайта томоша қилишим эҳтимолдан йироқ», − дейилган юзлаб изоҳларнинг бирида. Яна бири: «Бу инсон Гиннес рекордлар китобининг ҳақиқий қаҳрамони», − дейди. «Мен ушбу тасвирни кўриб, ўлиб қолишимга оз қолди», — дея фойдаланувчилар изоҳ қолдирган.