Ҳарри Кейн Англия Премьер Лигаси рекордини ўрнатди

«Тоттенҳэм» Премьер Лига 6-турида «Бёрнли» майдонида ғалабага эришди (0:1).

Учрашувдаги ягона гол 76-дақиқада Сон Ҳён Мин томонидан урилди. Унга голли узатмани Ҳарри Кейн амалга ошириб берди.

Англиялик ҳужумчи Премьер Лига 2020/21 йилги мавсумида жамоасининг 13 та голида қатнашди — 5 гол ва 8 та голли узатма.

Шу тариқа Ҳарри Кейн Премьер Лига мавсуми аввалидаги 6 турда энг кўп голда қатнашган футболчига айланди. Кейн бу борада Тьерри Анри (2004/05) ва Францэск Фабрегаснинг (2009/10) натижасини (12) ортда қолдирди.

Жозе Моуриньо шогирдлари ортда қолган олти турда жами 16 та гол уришга эришди. Бу ҳозирча лигадаги энг яхши натижа бўлиб турибди. Шунингдек, жамоа ҳужумчиси Сон Ҳён Мин 8 та гол билан тўпурарлар рўйхатида етакчилик қилмоқда. Солиштириш учун бутун бошли «Арсенал» (8) кореялик футболчи билан бир хил миқдорда тўп киритган.