«Барселона» «Эль-Класико»даги ҳакамлик юзасидан Испания футбол федерациясига шикоят хати ёзди

«Барселона» Ла Лига 6-тури доирасида «Реал»га қарши ўйиндаги (1:3) ҳакамлик борасида Испания футбол федерациясига расмий шикоят хати билан чиқди.

Каталон клубининг эътирозига сабаб бўлган асосий жиҳат Клеман Лангленинг ўйин қоидасини бузганидан кейин пенальти белгилангани бўлган. Ҳакам Хуан Мунуэра Мартинес VAR’га мурожаат қилган ва шундан кейин пенальти белгилаганди.

Diario Sport нашрининг хабарига кўра, қанот ҳаками Мартинесга Лангле томонидан ўйин қоидаси бузилмаганини, аксинча, ундан аввалги ҳолда унга нисбатан қўполлик бўлганини айтган. Бироқ бош ҳакам унинг сўзларига қулоқ солмаган ва 11 метрлик нуқтани кўрсатган.

Таъкидланишича, «Барселона» ҳакамлар суҳбати ёзиб олинган аудиони сўраш ниятида. «Барселона»дагиларнинг учрашувларга ҳакамлар тайинлашга масъул Карлос Веласко Карбалё бошчилигида клубга қарши кампания ўтказилаётганига ишончи комил.