Эскириб қолган свитерларни ташлашга шошилмаслик керак. Қайчи, ип ва игна ёрдамида улардан ўзингиз учун керакли бўлган бошқа буюмлар ясаш мумкин. Қандай қилиб, дейсизми? Марҳамат, бу ҳақда батафсил танишиб чиқинг.
Атиргул кўринишидаги ёстиқ
Керак бўлади:
- тайёр думалоқ шаклдаги ёстиқ;
- юпқа трикотаж свитер;
- игна-ип ёки елим пистолет;
- қайчи.
Бунинг учун эскирган трикотаж свитер 2,5 см қалинликдаги тасма шаклида кесиб чиқилади. Тасма узунлиги қанча кўп бўлса, атиргул шакли шунча чиройли кўринади. Тикиш жараёни ёстиқнинг марказидан бошланади.
Тасма айлана шаклида тикилиб, ёстиқ юзаси тўлдирилади. Агар ёстиқнинг орқасини ҳам шундай гул билан қоплаш керак бўлса, жараён худди шундай такрорланади. Диван учун мўлжалланган ушбу атиргул кўринишидаги ёстиқ ажойиб безак ўрнини босади.
Хушбўй таратувчи халтача
Керак бўлади:
- қуруқ лаванда;
- эфир мойи;
- гуруч;
- эски трикотаж свитер;
- игна;
- ип;
- қайчи.
Бунинг учун свитер жуда зич тўқилган бўлиши керак. Сабаби тешиклар орасидан гуруч ва ўтлар тўкилиб кетмаслиги учун. Шунингдек, свитер енги ажратиб олинади ва ичига бир стакан гуруч, лаванда гуллари ва эфир мойидан бир неча томчи қуйилади. Сўнгра халтачанинг икки томони ҳам тикиб чиқилади. Халтача камида 2-3 ой давомида ёқимли ҳид таратиб туради. Вақти-вақти билан халтача ичидаги аралашмани қимирлатиш тавсия этилади, шунда янада кўпроқ ҳид таралади.
Соч учун тасма
Керак бўлади:
- майда тўқилган свитер;
- ип;
- қайчи;
- тикув машинаси;
- мунчоқ ва бошқа безаклар.
Иложи борича свитернинг камроқ кийилган қисмидан тахминан 20 сантиметр қалинликда бош айланасидан икки баравар узунроқ тасма кесиб олинади ва тикув машинаси ёрдамида тикиб чиқилади. Свитердан яна 7х30 ўлчамдаги иккита овал тасма ажратиб олинади.
Бу унинг безаги учун керак бўлади. Бунинг учун ярмигача қайрилган матоларнинг ички қисми тикиб чиқилади ва ипи тортилади. Сўнгра гул шаклига келган матонинг марказига мунчоқлар тикиб қўйилади. Тайёр бўлган безакларни тасманинг ён тарафига тикиб қўйиш мумкин.
Юмшоқ ўриндиқ
Керак бўлади:
- эски свитер;
- ип;
- игна;
- свитер рангидаги қалин мато;
- ёстиқ ичини тўлдириш учун пахта ёки синтепон.
Свитер енглари олиниб, иложи борича думалоқ шаклга келтирилади. Чидамли бўлиши учун чет қисмлари мустаҳкам тикиб чиқилади. Свитер рангидаги матодан эса ўриндиқ ўлчами билан тенг бўлган қоплама жилд тикилади. У ҳам думалоқ шаклда бўлиб, ичи тўлдирилади ва устидан свитердан тикилган қоплама кийдирилади.
Яхшилаб думалоқ шакл берилади ва свитердан тайёр бўлган қопчанинг енг қисмлари чети тикилиб, сўнг ипи тортилади. Ажойиб кўринишдаги ўриндиқдан уйда қулайлик учун фойдаланиш мумкин.
Иссиқ пайпоқлар
Керак бўлади:
- узун енгли эски свитер;
- қайчи;
- тикув машинаси;
- ип.
Свитернинг енги кесиб олинади. Узунлигини ҳар ким ўз хоҳишига қараб танлаш мумкин. Пайпоқлар оёққа қулай бўлиши учун овал қисмини оёқ учларига мослаштирган афзал. Ички қисмларини машина ёрдамида тикиш мумкин. Тўқилган матони тикишда чет қисмларини ички тарафга қайириб тикишни унутмаслик муҳим.
Изоҳ (0)