Россияда пасайтирилган «Жигули» янги Kia К5 нархида сотувга қўйилди

«Auto.ru» сайтида «ВАЗ-2102» универсалининг сотувга қўйилган тўғрисида эълон пайдо бўлди: турли ўлчамли ғилдиракларга эга «Жигули» 1,5 миллион рублга (19,5 минг доллар) баҳоланмоқда — бу пулга янги Kia К5 харид қилиш мумкин. Бу ҳозирги кунда мазкур сайт орқали сотувга қўйилган энг қиммат «Жигули» ҳисобланади, деб ёзади Motor.

Эълон муаллифининг таъкидлашича, ушбу «ВАЗ-2102» SlоwLоw — «Кастом Концепция—2020»да ғолибликни қўлга киритган кўргазма лойиҳаси. Автомобиль 2019 йили Қримда харид қилинган бўлиб, унга бир кишигина эгалик қилган. Том қисми оқ, кузови Cаmdy жигаррангга бўялган «Жигули»га паст профилли резина кийгизилган ССР МК-1 дискалари, юкхонасига эса тўрт контурли «пневмоподвеска» компрессорлари ўрнатилган.

Оригинал жигарранг рангида ишланган салон идеал ҳолатда сақланган. Ўзгартириш киритилган жиҳатлари — орқани кўришга мўлжалланган ойна «Волга»ники, узатмалар қутиси ричаги хромланган ҳамда ташқи олдинги тиргакларнинг юқори қисмига Америкада ишлаб чиқарилган ойналар қотирилган.

«Жигули» двигатели янги 1,5 литрли «ВАЗ-2103»ники билан алмаштирилган бўлиб, у 75 от кучини тақдим этишга қодир. Агрегат модернизацияга учраган: муқобил тақсимлаш вали, Bimotors литийли коллектори, Weber карбюратори, янги ёқилғи узатгичлар ўрнатилган.

Аввалроқ «Auto.ru» сайтида 46 йил аввал ишлаб чиқарилган «Копейка» 7 минг долларга сотувга қўйилгани тўғрисида хабар берилганди.