Россияда 23 октябрь тонги ҳолатига кўра, коронавирусга чалиниш бўйича 17 340 та ҳолат қайд этилди, деб хабар бермоқда Meduza вирусга қарши курашиш бўйича тезкор штаб маълумотларига таяниб. Бу сутка давомида касалланганлар сони бўйича янги антирекорд. Аввалги юқори кўрсаткич 20 октябрда қайд этилган, шу куни 16319 кишида COVID-19 аниқланганди.

Фото: Pixabay

Янги аниқланган касалланиш ҳолатларининг энг кўпи Москва ( +5478 киши), Санкт-Петербургда (+710) ва Москва вилоятида (+472) қайд этилган. Мамлакатда касалланганларнинг умумий сони 1 480 646 нафарга етди.

Сутка давомида COVID-19 беморларининг 283 нафари, пандемия бошланганидан буён эса 25 525 нафари вафот этган. Соғайганлар сони эса 1 119 251 нафарни ташкил этмоқда, шу жумладан беморларнинг 11 263 нафари сўнгги бир-кеча кундузда тузалиб, касалхонадан жавоб берилган.

«Роспотребнадзор» маълумотларига кўра, Россияда коронавирусни аниқлаш бўйича сўнгги  24 соат давомида 546 мингта, умумий ҳисобда эса 56,2 миллиондан ортиқ тест ўтказилган.

Россия ҳукумати мамлакатда коронавирус тарқалиши туфайли қатъий чекловларни жорий қилишни режалаштирмаяпти.

Дунё бўйлаб коронавирусга чалиниш ҳолатлари сони бўйича ҳам антирекорд янгиланди. 22 октябрь куни COVID-19’га чалинганлар сони бир кеча-кундузда 423 819 кишига ўсган.  Бу 17 октябрдан буён кузатилган максимал кўрсаткичдир, ўшанда қарийб 413 минг кишида коронавирус аниқланган эди.