Гўзаллик стандартлари, қолипларининг ҳаммаси одамлар томонидан ўйлаб топилган. Аслида эса инсоннинг хунуги бўлмайди, ўзига хос ва бошқаларга ўхшамаган бўлади холос. Ташқи кўриниш борасидаги мавжуд стереотипларни ўзгартириб юборган, ҳеч кимга ўхшамагани билан машҳурликка эришган моделлар ҳақида маълумот берамиз.
Слик Вудс
Сликнинг болалиги осон бўлмаган: отасини бирон марта ҳам кўрмаган, онаси эса қамоқда жазо муддатини ўтаб чиққан ва қизининг келажаги билан қизиқмаган. Тишида кўзга ташланадиган муаммоси борлиги Вудсни ўзига бўлган ишончини камайтирган. У ҳам банк карталари билан боғлиқ муаммо сабаб қамоққа олинган ва бир неча ойдан кейин озодликка чиққан. Янги ҳаёти эса автобус бекатидан бошланган. Уни кўриб қолган маникенчи Esh Staymest реклама ролигида суратга тушишни таклиф қилган ва реклама муваффақиятли чиққан. Шундан кейин унга Calvin Klein, Yeezy, Mercedez-Benz, Moschino каби брендлардан таклифлар келиб туша бошлаган. Тишидаги диастема унинг ўзига хослиги билан бошқалардан ажралиб туришига сабабчи бўлган.
Брунетт Моффи
Мазкур моделга ғилайлик ташхиси қўйилган, лекин бу Брунеттнинг Keyt Moss, Sindi Krouford ва Kara Delevin каби машҳур моделлар етишиб чиққан Storm Models агентлигининг у билан ҳамкорлик қилмаслигига сабаб бўлмаган. Моделлик карьераси дўстона фотосессиядан кейин бошланган. Унинг дўстларининг биридан POP журнали учун қиз суратга олиб бериш илтимос қилинган. Кадрлар омадли чиққан ва улардан бири журнал муқоваси учун танлаб олинган. Модель кўзидаги муаммо унинг ўзи яхши кўриб, қадрлайдиган ўзига хослик эканини бир неча марта такрорлаган.
Дафна Селф
Британиянинг энг кекса модели Дафна мода оламидаги мавжуд қоидаларни бузиб ташлаган. Аслида у карьерасини 50 йилларда бошлаган. Reading универмагида ишлаётган вақт ҳамкасблари унга моделлар танловида иштирок этишни таклиф қилган. Бошланғич босқичларда муваффақиятга эришган, кўплаб машҳур моделлик агентларидан таклифлар келиб тушган, аммо бу узоққа бормаган. Қанчалик ажабланарли бўлмасин, Дафна 70 ёшдан кейин мода оламига қайтишни истаган. Кутилмаганда уни Лондон мода ҳафталигида иштирок этишга таклиф қилишган. У ерда машҳур мода агентлиги Models 1 вакилларидан бирининг эътиборини тортган. Шундан кейин турли мода чиқишларига таклиф қила бошланган. Дафна бошқаларга мақсад ёки орзуларига эришиш учун ҳеч қачон кеч бўлмаслиги, ёш шунчаки рақам эканини исботлаган модель ҳисобланади.
Диандра Форрест
Форрест замонанинг энг ёрқин ва эсда қоларли моделларидан. Диандрада албенизм касаллиги бўлган ва бу унинг бошқалар билан мулоқот қилишига халақит берган. Болалигида ундаги мазкур биологик ўзига хослик устидан кўп маротаба кулишган, шундан кейин унинг ота-онаси давлат мактабидан хусусий мактабга ўтказган. Харид вақтида у машҳур суратчи Шамир Хоннинг эътиборини тортган ва айнан у Диандранинг мода оламига қадам қўйишига сабабчи бўлган. Шундан кейин у кўплаб агентликлар, Бейонсе, Канье Уэст билан ишлаган, сурати бир қанча машҳур журналлар муқовасида чоп этилган. Унинг албенизмни ички ишонч ва кучга айлантира олгани, руҳан синиб қолмаганига қойил қолса арзийди.
Винни Ҳарлоу
Асл исми Шантель Браун-Янг бўлган модель мода оламидаги энг талабгир моделлардан. Бунга Виннининг ўзига хослиги сабаб. Модель болалигидан тери касаллигидан азият чеккан. Тенгдошлари уни «зебра» деб масхара қилган. Руҳан эзилган Винни ҳатто жонига қасд қилмоқчи бўлган. Мактабини алмаштирган ва колл-марказда ишлаган. Моделлик оламига қадам қўйишига канадалик журналист сабабчи бўлган. У Facebook’да Виннининг суратини кўриб, моделлик бизнесида ўзини синаб кўришни таклиф қилган.
Кейинроқ America’s Next Top Model шоусининг продюссери Тайра Бэнкс янги мавсумда иштирок этишни таклиф қилган. Шундан кейин Харлоуга ҳамкорлик борасида таклифлар келиб туша бошлаган. Бугунги кунда Винни моделликдан ташқари, бу каби касалликдан азият чекаётганларга кўмаклашади ва уларни камситилишига қарши акцияларда фаол иштирок этади.
Изоҳ (0)