Тоғли Қорабоғ муаммосини фақат тинч йўл билан ҳал қилиш мумкин. Бу ҳақда Арманистон ташқи ишлар вазирлиги эълон қилган баёнотда айтилади, деб ёзади «РБК».
«Биз яна бир карра таъкидлаймиз, Тоғли Қорабоғ низоси фақатгина ЕХҲТ Минск гуруҳи ҳамраислиги доирасида — халқаро мандатга эга форматда тинч йўл билан тартибга солиниши мумкин», — дея қайд этди вазирликдагилар.
Дипломатик муассаса қўшимча қилишича, Арманистон ЕХҲТ Минск гуруҳига раисдош мамлакатлар етакчилари ҳамкорлигида 10 ва 17 октябрда келишилган ўт очишни тўхтатиш ҳақидаги битимларнинг сўзсиз бажарилишини қўллаб-қувватлайди.
Шунингдек, Ереван Озарбайжон ва Туркияни ўт очишни тўхтатиш режимини ўрнатиш бўйича «халқаро ҳамжамиятнинг уринишларига тўсқинлик қилиш сиёсати»дан, шунингдек, «айбни Арманистон томонига ағдариш»дан воз кечишга чақирди.
Аввалроқ Арманистон бош вазири Никол Пашинян ушбу босқичда Тоғли Қорабоғдаги низонинг дипломатик ечими йўқлигини маълум қилганди. Унинг сўзларига кўра, Ереван ўз талабларини енгиллаштириб, муросага келишга уринди, аммо Боку томонидан жавоб қадами қўйилмади.
У мамлакат аҳолисига қилган мурожаатида халқни қўлга қурол олиб, ватанни ҳимоя қилишга чақирди. «Асосий мақсадимиз охиригача курашиш ва халқимиз манфаатларини ҳимоя қилишдан иборат. Бугун Озарбайжон эгаллаб турган позиция биринчи навбатда қўлга қурол олиш ва ватанни ҳимоя қилишни тақозо этмоқда», — деди у.
Туркия эса Боку илтимос қилса, «иккиланмасдан» Озарбайжонга аскарларини жўнатиши ва ҳарбий кўмак беришини маълум қилди.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган иккита уринишга қарамасдан, 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
19 октябрда Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилган. Кейинроқ Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтган.
Изоҳ (0)