Россияда сўнгги суткада 15 971 кишида коронавирус қайд этилди, деб хабар бермоқда Meduza коронавирусга қарши кураш бўйича тезкор штабга таяниб. Бир кун аввал 15 700 кишида COVID-19 аниқлангани ҳақида хабар берилганди, 20 октябрь куни эса 16 3019 кишида вирус аниқланиб, касалланганлар сони кунлик ортиши бўйича рекорд ўрнатилганди.
Янги касалланганлар сони бўйича Москва — 4413 та ҳолат (бир кун аввал 4389 та бўлганди) ва Санкт-Петербург — 697 та янги ҳолат (бир кун аввал 684 та ҳолат эди) етакчилик қилмоқда. Москва коронавирусдан ўлимлар сони бўйича ҳам биринчи ўринда. Россиядаги COVID-19 қурбонларининг чорак қисми айнан Москва шаҳрига тўғри келади. Бир ой ичида Москвада касалланиш ҳолатлари беш мартадан кўпроқ ўсган. Касалхоналарга энг оғир беморлар ётқизилмоқда.
Россияда коронавирус тарқалиши бошланганидан буён 1 463 306 нафар кишида касаллик қайд этилган. Уларнинг 1 107 988 нафари, шу жумладан, ўтган сутка давомида беморларнинг 11 428 нафари соғайган.
Сутка давомида 290 киши, пандемия бошланганидан буён эса Россияда 25 242 киши COVID-19 қурбони бўлган. Мамлакатда 13 октябрдан бошлаб сутка давомида вирус қурбонлари сони 200 кишидан ортиқ бўлмоқда.
«Роспотребнадзор» маълумотларига кўра, Россияда коронавирусни аниқлаш бўйича сўнгги 24 соат давомида 512 мингта, умумий ҳисобда эса 55,6 миллионта тест ўтказилган.
Изоҳ (0)