«Ювентус» ҳужумчиси Криштиану Роналдунинг коронавирусга топширган такрорий тести яна ижобий хулоса берди, дея хабар қилмоқда Correio da Manha.
Португалиялик футболчи катта эҳтимол билан Чемпионлар Лигаси доирасида «Барселона»га қарши кечадиган баҳсни ўтказиб юборади.
Учрашув 28 октябрь кунига мўлжалланган. УЕФА протоколи бўйича Роналду учрашувда қатнаша олиши учун ўйиндан бир ҳафта аввал коронавирусга топширган тести салбий натижа бериши керак.
Шунингдек, ҳужумчи А Серия доирасидаги «Верона»га қарши ўйинда ҳам қатнаша олмайди.
АS хабарига кўра, Роналду ўйинга 24 соат қолганида коронавирус тестидан муваффақиятли ўта олса «Барселона»га қарши учрашувда қатнашиш ҳуқуқига эга бўлади. Испан нашрида айтилишича, туринликлар клуби футболчининг ҳолати ҳақида УЕФАга ҳисобот жўнатган. Унда футболчида ҳеч қандай аломатлар йўқлиги ва тана ҳарорати кўтарилмагани ҳақида маълум қилинган.
Эслатиб ўтамиз, Португалия терма жамоаси йиғини вақтида Роналдуда коронавирус аниқланди. У «Ювентус»нинг «Кротоне» (1:1) ва «Динамо Киев»га (2:0) қарши ўйинларини ўтказиб юборди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)