«Қора ният»даги Халит вафот этади, Керем сериалдан кетади, Ўзжан Денизнинг янги лойиҳаси. Турк киноси янгиликлари (фото)

Турк киносаноатининг ўз ўрнига эга бўлган актёр ва актрисалари ҳақидаги сўнгги маълумотларни эътиборингизга ҳавола этишда давом этамиз.

Кенан Имирзалиўғлу ва Синем Кобал қиз фарзандли бўлади. Журналистларнинг фарзандини қандай ном билан аташини сўраб қилган мурожаатига Кенан исм аллақачон танлангани, аммо уни рафиқаси томонидан маълум қилинса, тўғри бўлишини билдирган. «Uçаnkuş» журналида фаолият олиб борадиган Бариш Агилга кўра, қизга маъноси ёрқин қизил рангни билдирадиган Лалин деб исм қўйилади.

Серенай Сарикая гўзаллик марказидан чиқаверишда мухбирлар эътиборидан четда қолмаган. Уларнинг қандай гўзаллик амалиётини бажаргани ҳақидаги саволга шошаётганини баҳона қилган актриса бу муаммо ҳақида гапирмаслигини айтиб, аниқ жавоб бермаган.

Мурат Йилдиримнинг рафиқаси Иман Элбанини соч турмаклаш салони ёнида кутиб тургани ҳам диққатдан четда қолмаган. Актёр Иманинг Туркияда ўзидан бошқа ҳеч кими йўқлиги сабаб у билан ҳамма ерда бирга эканига ойдинлик киритган.

Иброҳим Челиккол Instagram саҳифасида янги сурат билан бўлишган ва унга «Челиколлар оиласи», деб изоҳ қолдирган.

Италияда Жан Яманга бағишлаб китоб чоп этилди. Corriere della Sera газетасида фаолият юритадиган Флорианна Рулло муаллифлиги асосида ёзилган китоб «Жан Яман — мен сени умрбод севаман» деб номланган. Италияда сотувга чиқарилган китобни 12,9 еврога харид қилиш мумкин. Мазкур китоб актёр ҳақидаги қизиқарли фактлар унинг оиласи, болалиги ва талабалик йиллари, шунингдек, шахсий ҳаёти ва интервьюларни ўз ичига олади.

«Қора ният» сериали сюжетида ўзгаришлар юз бериши кутилмоқда. Унда Талат Булут гавдалантираётган Халит Аргун сериалнинг 85-қисмида вафот этади. Бирсен Алунташнинг маълум қилишича, Гекхан Алкан ҳам сценарий бўйича сериални тарк этади.

«Туркиянинг Жорж Клуниси» — Ўзжан Дениз «Мен сени узоқ кутдим» сериалининг суратга олиш жамоаси билан биргаликда Эрзинжандан қайтиб келди, суратга олиш ишлари Истанбулда давом этади. Актёр Ирем Ҳелважиўғлу билан бирга рол ижро қиладиган ушбу сериал сюжети ҳаётий воқеаликка асосланган.

Демет Ўздемир Италиянинг Вериссимо телевизион шоуси меҳмони бўлган.