Сериал ёки фильмда ишлатилган буюм ва кийим-кечакларнинг кейинги тақдири нима бўлиши кўпчилик телетомошабин ва мухлисларга қизиқ бўлса, ажаб эмас. Маълумотларга қараганда, суратга олиш жараёни якунланганидан кейин актёрлар либосларининг ҳаммаси қутиларга солинади ва лойиҳа номи ёзиб, олиб қўйилади. Улардан кейинчалик ҳам фойдаланиш мумкин, фақат бош қаҳрамон томонидан эмас, масалан, Ҳинд киноларида қўшиқ ижро этилганда орқа фонда рақсга тушадиган қиз ва йигитлар кийиши, шунда ҳам кийим аввалгидан ўзгартирилиши мумкин. Баъзида эса актёрлар фильмда улар учун қадрли бўлиб қолган буюмни эсдалик сифатида олиб қўйиши мумкин. Бунга Болливуд юлдузи Риши Капурнинг ижроси давомида кийган свитерларни йиғиши яққол мисол.
Мадхури Дикшитнинг 408 минг долларлик яшил «лехенга»си
Актрисанинг «Девдас» фильмидаги ижросида кийган барча либослари ўзига хос кўринишга эга бўлган. Либослар қаҳрамон феъл-атворига мос равишда, буюртма асосида тикилган. Фильм экран юзини кўрганидан кейин бозорда кўйлакка ўхшаш кўплаб нусхалар пайдо бўла бошлаган, аммо бир мухлис фильмдаги либоснинг оригиналини харид қилишни истаган. У аукционда Мадхури «Maar Dala» қўшиғини ижро қилишда кийган яшил «лехенга»ни 3 крор (408 минг доллар)га сотиб олган.
Кишор Кумарнинг 76 минг долларлик тақдим қилинмаган қўшиғи
«Tum hi to ho» деб номланган ва тақдим қилиб улгирилмаган қўшиқ Кишор томонидан вафот этишидан атиги уч кун аввал, 1987 йил октябрда ёзилган. Аукционда ижодкорнинг ашаддий мухлисларидан бири ушбу қўшиқни 0,56 крор (76 минг доллар)га сотиб олиб, тинглаш бахтига муяссар бўлган.
Дев Ананднинг 5451 долларлик оқ-қора фотолари
Девнинг 45 дона, имзоси туширилган оқ-қора фотоси 400 минг рупий (5451)га сотилган.
Приянка Чопранинг 3407 долларлик оёқ кийими
2013 йилда ЮНИСЕФ томонидан ташкил қилинган «Қизларни қутқарамиз» дастури учун Приянка аукционга ўзининг Чристиан Лоубоутин бренди томонидан тақдим қилинган пушти пойабзалини қўйган. Ушбу оёқ кийим 250 минг рупий (3407 доллар)га сотиб олинган.
Амир Хоннинг 2125 долларлик крикет таёқчаси
Актёрнинг «Бир куни Ҳиндистонда» фильмидаги ижроси давомида фойдаланган крикет таёқчаси 156 минг рупий (2125 доллар)га сотилган. Аукционда йиғилган маблағдан хайрия сифатида фойдаланилган.
Шамми Капурнинг 2125 долларлик шарфи
1961 йилда суратга олинган «Жунгли» фильмида Шамми томонидан тақилган шарф 156 минг рупий (2125 доллар)га харид қилинган. Мазкур фильмда актёр кийган куртка эса шу аукционнинг ўзида 88 минг рупий (1199 доллар)га сотилган. Уни Амир Хон ўз коллекцияси учун харид қилган.
Салмон Хоннинг 1935 долларлик сочиғи
Салмон Хоннинг «Менга турмушга чиқасанми?» сериалида фойдаланган сочиғи 142 минг рупий (1935 доллар)га сотиб олинган. Маблағ хайрия ишларига сарфланган.
Фарух Шайхнинг 1307 долларлик узуги
Фарух Шайх «Азизам Умрао» фильмида гавдалантирган қаҳрамон узуги аукционда 96 минг рупий (1307 доллар)га сотилган.
Мадхури Дикшитнинг 1089 долларлик сариқ сариси
Мадхури «Ўғил» фильмининг «Dhak Dhak Karne Laga» клипида кийган сариқ рангли сари ёш қиз ва аёллар орасида трендга айланган. Ушбу либоснинг нусхалари учун навбат тинмагани билан, оригиналини харид қилиш фақатгина бир мухлисга насиб қилган ва бу унга 80 минг рупий (1089 доллар)га тушган.
Изоҳ (0)