Янги Зеландия Лейбористлар партияси 17 октябрь куни бўлиб ўтган парламент сайловларида тарихий ғалабани қўлга киритди, деб хабар бермоқда The Guardian. Партия раҳбари бўлган мамлакатнинг амалдаги бош вазири Жасинда Ардерн иккинчи муддатга лавозимида қолади.
Фото: AP Photo
«Ардерннинг COVID-19 эпидемияси билан курашишдаги моҳирона раҳбарлиги, илм-фан ва мутахассисларга бўлган ишончи муддатидан аввал рекорд миқдорда овоз берган янги зеландияликларнинг ишончини қозонди. Бу унинг партиясига сўнгги 50 йилда бошқа партияларга қараганда кўпроқ овоз олиш имконини берди», — деб ёзади нашр.
Лейбористлар 49 фоиз, мухолифатчи Миллий партия эса 27 фоиз овоз олган. Бу кўрсаткич Лейбористлар партиясига бир палатали парламентда 120 ўриндан 64 ўринни эгаллаш имконини беради.
Сайлов натижалари эълон қилингач Жасинда Ардерн ўз тарафдорларига қарата мурожаат билан чиқиб, «кучли мандат» учун сайловчиларга миннатдорчилик билдирди. У сайловлар «албатта, зиддият келтириб чиқариши шарт эмаслиги»ни таъкидлаб, ҳамкорлик ва ижобий асосда бошқаришга ваъда берди.
40 ёшли Жасинда Ардерн Янги Зеландия бош вазири лавозимини 2017 йилнинг октябридан буён эгаллаб келмоқда. У инқирозга, шу жумладан, 2019 йилнинг мартида Крайстчёрч шаҳридаги масжидларга уюштирилган ҳужум ва COVID-19 эпидемиясига қарши чора кўргани учун мамлакатда ва хорижда мақтовга сазовор бўлган. Жонс Ҳопкинс университети маълумотига кўра, Янги Зеландияда коронавирус билан касалланганлар сони 2000 нафардан кам.
