Forbes рус тилида сўзлашувчи тиктокчилар даромадларининг биринчи рейтингини тузгани, биринчи ўринни 9,5 миллион нафар обуначига эга ўзбекистонлик 22 ёшли Раҳим Абрамов эгаллагани тўғрисида хабар берилганди. Ҳисоб-китобларга кўра, ўтган йилда унинг TikTok’дан олган даромади 10,47 миллион рублни (136 минг доллар атрофида) ташкил қилган. Абрамов Forbes Digest’га берган интервьюсида қаерда яшаши, даромади асосан нимадан эканлиги ҳақида сўзлаб берди.
Маълумотларга кўра, Абрамовнинг ёшлиги Сибир ўлкаси Могоча қишлоғида ўтган. Ўзи яшаган ҳудудда бокс ва футбол билан шуғулланган, кейин спорт мактабида ўқиш учун Читага кўчиб келган. 16 ёшида 9-синфни битиргач, уни техникумга қабул қилишмагани учун компьютерларни дастурлаш орқали топган бир неча минг рубли билан Москвага кўчиб келган.
Раҳим Абрамовнинг Fendi қўшиғига Россиядаги TikTok фойдаланувчилари томонидан 3 миллиондан ортиқ клип суратга олинган ва бу Россия сегменти учун рекорд ҳисобланади. Ҳозирда Moskva City’даги пентхауслардан бирида дўстлари билан яшаб келмоқда.
«Олти йил олдин Москвага кўчиб келганман. Дастлаб ётоқхонада, кейин квартирада яшаб юрдим. Орзум City’да яшаш, эрталаб уйғонганингда атрофни кузатиш қанчалик мароқли бўлишини ҳис қилиш эди. Бу мени илҳомлантиради деб ўйлардим. Аммо бу ҳам оддий квартирада яшашдек экан, атрофдаги манзаралар ҳам жонга тегиши мумкинлиги маълум бўлди», — дейди блогер.
Раҳим бой оиладан чиқмагани, ота-онаси оддий одамлар эканини айтади. Ёшлигида Хитойда ишлаб чиқарилган кийим-кечакларни чегара яқинидаги бозордан арзон нархларда олиб, сўнг марказий бозорга олиб бориб сотишда ота-онасига ёрдамлашган. Бозорда савдо қилган: «Ўша пайтларда яхши пул тўплаганман. Бир сафар 12 ёшимда 11 минг рубль тўплаганимда онам менга берсанг, 3 ойдан кейин 20 минг қилиб қайтараман, деб олиб қўйганди. Кейинроқ пулларимни сўраганимда мактаб формангга, ўқув қуролларингга ишлатдим деб қайтариб бермаганди. Ҳозир катта бўлгач, уни тушуна бошладим. Ўрнида бўлганимда мен ҳам бермаган бўлардим (кулади). Болалигим яхши ўтган, дўстларим орасида ичадиган, чекадиганлари кўп эди. Менга ҳам таклиф қилишарди. Лекин мен рад қилардим. Мусулмон бўлганим учун кўп мажбурлашмасди, буни тўғри қабул қилишарди».
Блогер ҳозирда алоҳида лойиҳалар билан ҳамкорлик қилиб, даромад олади. Ўзига ёқмаган мавзудаги рекламаларни, масалан, сайловга тарғибот ишларини қилмайди. Сохталик билиниб тургани учун бу нарсалар обуначиларини ундан совитиб юбориши мумкин деб ҳисоблайди. Фақат ўзига ёқадиган видеоларни эълон қилади.
Интервью вақтида у онаси ҳозир ватанида яшаётганини айтган. Журналистнинг «Ўзбекистондами?», деган саволига «Йўқ, мен у ерда туғилганман, холос», деб жавоб берган. Умуман, болалик вақтларини эсларкан Ўзбекистон ҳақида ҳеч нима демаган.
Ҳозирда TikTok юлдузи яшаб келаётган Moskva City’даги квартиранинг ижараси ойига 400 минг рублни (5200 доллар) ташкил этади. Блогернинг сўзларига кўра, у ҳеч қаерда ишламасдан фақат дам олиб яшашни хоҳлаб қолса, бугунги кунга қадар жамғарган маблағлари ушбу квартирада яна 2 йиллар атрофида яшашга етади. Аммо у ҳозирга қадар миллион доллар ишлаб топмаганини таъкидлаган.
«Бу йўналишдаги фаолиятимни дастлаб вайнлар (қизиқарли қисқа роликлар) суратга олишдан бошлаганман. Оператор ёллашнинг иложи бўлмагани сабаб камерани штативга қотириб, суратга тушардик. Кейин штативни бошқа жойга ўрнатиб, ракурсни ўзгартирардим. Бир ойда ярим миллионга яқин обуначи йиғиб қўйдим. Ишимни ривожлантириш учун ота-онамдан 10 минг рубль қарз олгандим. Ва бу бекорга кетмаган, уларни мақсадли сарфладим», — дейди Раҳим.
Блогер бундан йил олдин — ўзи мустақил видеороликлар тайёрлашни бошлаганидан сўнг, катта пул топа бошлаган.
«Биринчи ойда 100 минг рубль ишлаб топдим. Секин-аста 200 минг рубль тўплаб, дўстим билан камера сотиб олгани бордик. Илк миллионимни 19 ёшимда топганман. Ўшанда адашмасам, Қозоғистонга бориб, энг қиммат меҳмонхонада яшаб, бир ҳафтада 300 минг рубль сарфлаб келгандик. Қўлимда ҳеч қачон пул турмаган, уларни доим ижод йўлида сарфлаб юбораман. Ҳозир одамлар клип олиш учун ишлатаётган пулини вайн ёки бир дақиқали ролик учун ҳам сарфлаб юборавераман.
Олдинлари ойига 4-5 миллион рубль ишлаб топган бўлса, кейин барчаси ўзгарди. Барча пулларимни мусиқага йўналтирдим. Турли анжомлар, студия ижарага олдим, жамоамга сарфладим», — дейди у.
Раҳимнинг айтишича, вайнлардан келадиган даромад бу реклама ингрециялари.
«Ҳамма капперларни реклама қилишга тушиб кетганида мен уларни реклама қилмадим (Каппер — спорт ўйинлари натижаларини олдиндан башорат қилиб, пул тикиладиган ўйин). Бунга виждоним йўл қўймасди. Чунки буларнинг барчаси ёлғон эканлигини тушунардим. Аммо пул керак бўлгани сабаб бошқа букмекерлик конторалари билан ҳамкорлик қилганман», — дейди блогер.
Рекламалар орқасидан ишлаб топган пулига харид қилган кўзга кўринарли нарсалари орасида Mercedes-Benz E-Class’ига кирувчи модель ҳам бўлиб, унинг нархи 5 миллион рубль атрофида (65 минг доллар).
Раҳим узоқ вақтда TikTok’нинг Россиядаги энг машҳур аёл фойдаланувчиси 21 ёшли Дина Саева билан учрашиб юрган. Унинг 16,4 миллион нафар обуначилари бўлиб, у 2019 йил давомида 4,93 миллион рубль даромад кўрган.
Раҳим келажакда катта лойиҳалар, йирик шартномаларни амалга ошириш учун ҳозирда турли клублар, концертларга бормайди, катта миқдордаги рекламаларни олмайди. TikTok’да бувиси билан тушган ролиги 500 миллион маротаба томоша қилинган. Раҳим TikTok’да ўзининг қўшиқлари стримингидан, яъни унинг мусиқаси остида жойланган ҳар бир видеодан даромад кўради. Ҳозирда яшаши, студияси, жамоасидагилар маош тўлаш орқали ойига 2 миллион рубль сарфламоқда.
Изоҳ (0)