Россиялик таниқли рэпер ва бастакор Алишер Моргенштерн 18 октябрь куни Instagram’да Mercedes-Benz Э200 машинаси учун танлов эълон қилди. Унда Бухорода яшовчи @aza_1002 аккаунти эгаси ғалаба қозонган, дея хабар қилди «Gazeta.uz».
Хабарда қайд этилишича, Mercedes-Benz’нинг яна бир халқона номи «Мерин», қўшиқчи ўз композицияларидан бирини ушбу машинага бағишлаган (унда ҳақоратли сўзлардан кўп фойдаланилган), қўшиқ Youtube’га юкланган вақтда жуда тез фурсатларда 80 миллион мартадан кўпроқ кўрилган. Тахминларга кўра, Моргенштерн машина учун 4 миллион рубль (тахминан 51 минг АҚШ доллари) сарфлаган.
Giveaway’да (одатда ижтимоий тармоқларда обуна ёки бошқа ҳаракат учун эълон қилиш урфга кирган танлов) 907 мингдан зиёд фойдаланувчи иштирок этган. Моргенштерн Бухорода яшовчи ғолиб билан боғланган ва автомобилни шахсан ўзи етказиб беришини ваъда қилган.
«Мен автомобилни дунёнинг ҳар қандай нуқтасига исталган вақтда етказиб беришни ваъда қилганман. Ўзбекистон бўлса, Ўзбекистон-да. Чегаралар ёпиқ бўлса, маълум вақт кутишимизга тўғри келади. Ёки чегара яқинида машинани ўтказиб бериш мумкин. Божхона тўлови талаб қилинса, уни ҳам тўлаймиз», — деган қўшиқчи.
Рэпер Ўзбекистонда хорижда ишлаб чиқарилган машина учун белгиланган божхона тўловлари миқдоридан хабар топгач, ўз Stories’ида видеохабар қолдирган.
«Ўзбекистонда машина учун божхона тўлови қанча эканини биласизми? Унинг нархи машина нархига тенг экан», — деган Моргенштерн. Тўғридан-тўғри эфири вақтида у машинани етказиб беришда ёрдам кераклиги ҳақида ҳам гапирган.
«Биз шов-шув кўтариб борамиз ва машинани ҳамюртингизга топширамиз. Сизлар ҳам бизга пешвоз чиқинг», — деган Моргенштерн. Бухоролик ғолиб рэпер билан суҳбатда унинг Instagram’даги профилини «бузиш»га уринишлар бўлаётганини билдириб, аккаунтини ёпиб қўйган.
Моргенштерн ҳақида
Алишер Валиев (Моргенштерн тахаллуси немис тилидан таржима қилинганда «тонгги юлдуз») реп айтишни 12 ёшида бошлаган, юқори синфда ўқиб юрган вақтларида «қора алкоголизм» йилларини ўтказиб, машҳур бўлган, дунё тан олган реп-юлдузларининг ҳаёти ҳақида реплар айтган. Уфада яшовчи 22 ёшли мусиқачи З авлоди ҳавас қиладиган хонандага айланган ва Instagram’даги тўғридан-тўғри эфирда оддий, содда трекларини ижро этиб, миллионлаб даромад қилмоқда, дейилади Forbes маълумотида.Моргенштерн бошқалар ижро этган қўшиқлар билан танилган: 2018 йилда у «ИзиРеп» туркумидаги видеоларни тайёрлади ва уларда таниқли ижрочиларнинг оммалашган қўшиқларини жамлади (Элжей, Кизару ва Face), шунингдек, ушбу содда репларни бошқа ҳар қандай одам ижро қилиши мумкинлигини тушунтирди.
Журналист Николай Редкиннинг Meduza эълон қилган мақоласида Алишернинг бошқалар томонидан ўзига йўллаган салбий фикрлардан усталик билан фойдаланиши ва YouTube’да реакциялар яхши баҳоланишини англаган ҳолда тўғри ҳаракатлар қилганини эътироф қилган. 2018 йилда рэпер ўзининг биринчи альбомини тақдим қилди, Россия бўйлаб турга чиқди ва 100 минг рубллик камерани ёқиб юборди. Кейинроқ ушбу ҳаракатига изоҳ бериб, бу одамлар диққатини тортишни тезкор ва енгил усули эканини қайд этди: оммалашган блогернинг ишлаб топаётган пуллари, муҳокама қилинаётганидек, у қадар кўп эмас.
2019 йил охирида у тўғридан-тўғри эфирда қўшиқлар альбомини ёзишини эълон қилди ва ҳар бир студия сессиясини ливе тарзда ижтимоий тармоққа жойлаштириб борди. Якунда ҳосил бўлган релизга «Афсонавий чанг» деб ном берди (2020 йил январида сотувга чиққан) уни барча стриминг сервисларида 500 миллион мартадан кўп эшитишган (ушбу рақам сентябрь ойи ҳолатига олинган), альбомнинг ҳар бир треки «платинали» диск даражасига чиқди. Моргенштерн қўшиқларида ҳақоратли сўзлар, сўкинишлар кўп учрайди.
Изоҳ (0)