Forbes rus tilida so‘zlashuvchi tiktokchilar daromadlarining birinchi reytingini tuzgani, birinchi o‘rinni 9,5 million nafar obunachiga ega o‘zbekistonlik 22 yoshli Rahim Abramov egallagani to‘g‘risida xabar berilgandi. Hisob-kitoblarga ko‘ra, o‘tgan yilda uning TikTok’dan olgan daromadi 10,47 million rublni (136 ming dollar atrofida) tashkil qilgan. Abramov Forbes Digest’ga bergan intervyusida qayerda yashashi, daromadi asosan nimadan ekanligi haqida so‘zlab berdi.
Ma’lumotlarga ko‘ra, Abramovning yoshligi Sibir o‘lkasi Mogocha qishlog‘ida o‘tgan. O‘zi yashagan hududda boks va futbol bilan shug‘ullangan, keyin sport maktabida o‘qish uchun Chitaga ko‘chib kelgan. 16 yoshida 9-sinfni bitirgach, uni texnikumga qabul qilishmagani uchun kompyuterlarni dasturlash orqali topgan bir necha ming rubli bilan Moskvaga ko‘chib kelgan.
Rahim Abramovning Fendi qo‘shig‘iga Rossiyadagi TikTok foydalanuvchilari tomonidan 3 milliondan ortiq klip suratga olingan va bu Rossiya segmenti uchun rekord hisoblanadi. Hozirda Moskva City’dagi pentxauslardan birida do‘stlari bilan yashab kelmoqda.
“Olti yil oldin Moskvaga ko‘chib kelganman. Dastlab yotoqxonada, keyin kvartirada yashab yurdim. Orzum City’da yashash, ertalab uyg‘onganingda atrofni kuzatish qanchalik maroqli bo‘lishini his qilish edi. Bu meni ilhomlantiradi deb o‘ylardim. Ammo bu ham oddiy kvartirada yashashdek ekan, atrofdagi manzaralar ham jonga tegishi mumkinligi ma’lum bo‘ldi”, — deydi bloger.
Rahim boy oiladan chiqmagani, ota-onasi oddiy odamlar ekanini aytadi. Yoshligida Xitoyda ishlab chiqarilgan kiyim-kechaklarni chegara yaqinidagi bozordan arzon narxlarda olib, so‘ng markaziy bozorga olib borib sotishda ota-onasiga yordamlashgan. Bozorda savdo qilgan: “O‘sha paytlarda yaxshi pul to‘plaganman. Bir safar 12 yoshimda 11 ming rubl to‘plaganimda onam menga bersang, 3 oydan keyin 20 ming qilib qaytaraman, deb olib qo‘ygandi. Keyinroq pullarimni so‘raganimda maktab formangga, o‘quv qurollaringga ishlatdim deb qaytarib bermagandi. Hozir katta bo‘lgach, uni tushuna boshladim. O‘rnida bo‘lganimda men ham bermagan bo‘lardim (kuladi). Bolaligim yaxshi o‘tgan, do‘stlarim orasida ichadigan, chekadiganlari ko‘p edi. Menga ham taklif qilishardi. Lekin men rad qilardim. Musulmon bo‘lganim uchun ko‘p majburlashmasdi, buni to‘g‘ri qabul qilishardi”.
Bloger hozirda alohida loyihalar bilan hamkorlik qilib, daromad oladi. O‘ziga yoqmagan mavzudagi reklamalarni, masalan, saylovga targ‘ibot ishlarini qilmaydi. Soxtalik bilinib turgani uchun bu narsalar obunachilarini undan sovitib yuborishi mumkin deb hisoblaydi. Faqat o‘ziga yoqadigan videolarni e’lon qiladi.
Intervyu vaqtida u onasi hozir vatanida yashayotganini aytgan. Jurnalistning “O‘zbekistondami?”, degan savoliga “Yo‘q, men u yerda tug‘ilganman, xolos”, deb javob bergan. Umuman, bolalik vaqtlarini eslarkan O‘zbekiston haqida hech nima demagan.
Hozirda TikTok yulduzi yashab kelayotgan Moskva City’dagi kvartiraning ijarasi oyiga 400 ming rublni (5200 dollar) tashkil etadi. Blogerning so‘zlariga ko‘ra, u hech qayerda ishlamasdan faqat dam olib yashashni xohlab qolsa, bugungi kunga qadar jamg‘argan mablag‘lari ushbu kvartirada yana 2 yillar atrofida yashashga yetadi. Ammo u hozirga qadar million dollar ishlab topmaganini ta’kidlagan.
“Bu yo‘nalishdagi faoliyatimni dastlab vaynlar (qiziqarli qisqa roliklar) suratga olishdan boshlaganman. Operator yollashning iloji bo‘lmagani sabab kamerani shtativga qotirib, suratga tushardik. Keyin shtativni boshqa joyga o‘rnatib, rakursni o‘zgartirardim. Bir oyda yarim millionga yaqin obunachi yig‘ib qo‘ydim. Ishimni rivojlantirish uchun ota-onamdan 10 ming rubl qarz olgandim. Va bu bekorga ketmagan, ularni maqsadli sarfladim”, — deydi Rahim.
Bloger bundan yil oldin — o‘zi mustaqil videoroliklar tayyorlashni boshlaganidan so‘ng, katta pul topa boshlagan.
“Birinchi oyda 100 ming rubl ishlab topdim. Sekin-asta 200 ming rubl to‘plab, do‘stim bilan kamera sotib olgani bordik. Ilk millionimni 19 yoshimda topganman. O‘shanda adashmasam, Qozog‘istonga borib, eng qimmat mehmonxonada yashab, bir haftada 300 ming rubl sarflab kelgandik. Qo‘limda hech qachon pul turmagan, ularni doim ijod yo‘lida sarflab yuboraman. Hozir odamlar klip olish uchun ishlatayotgan pulini vayn yoki bir daqiqali rolik uchun ham sarflab yuboraveraman.
Oldinlari oyiga 4-5 million rubl ishlab topgan bo‘lsa, keyin barchasi o‘zgardi. Barcha pullarimni musiqaga yo‘naltirdim. Turli anjomlar, studiya ijaraga oldim, jamoamga sarfladim”, — deydi u.
Rahimning aytishicha, vaynlardan keladigan daromad bu reklama ingretsiyalari.
“Hamma kapperlarni reklama qilishga tushib ketganida men ularni reklama qilmadim (Kapper — sport o‘yinlari natijalarini oldindan bashorat qilib, pul tikiladigan o‘yin). Bunga vijdonim yo‘l qo‘ymasdi. Chunki bularning barchasi yolg‘on ekanligini tushunardim. Ammo pul kerak bo‘lgani sabab boshqa bukmekerlik kontoralari bilan hamkorlik qilganman”, — deydi bloger.
Reklamalar orqasidan ishlab topgan puliga xarid qilgan ko‘zga ko‘rinarli narsalari orasida Mercedes-Benz E-Class’iga kiruvchi model ham bo‘lib, uning narxi 5 million rubl atrofida (65 ming dollar).
Rahim uzoq vaqtda TikTok’ning Rossiyadagi eng mashhur ayol foydalanuvchisi 21 yoshli Dina Sayeva bilan uchrashib yurgan. Uning 16,4 million nafar obunachilari bo‘lib, u 2019-yil davomida 4,93 million rubl daromad ko‘rgan.
Rahim kelajakda katta loyihalar, yirik shartnomalarni amalga oshirish uchun hozirda turli klublar, konsertlarga bormaydi, katta miqdordagi reklamalarni olmaydi. TikTok’da buvisi bilan tushgan roligi 500 million marotaba tomosha qilingan. Rahim TikTok’da o‘zining qo‘shiqlari strimingidan, ya’ni uning musiqasi ostida joylangan har bir videodan daromad ko‘radi. Hozirda yashashi, studiyasi, jamoasidagilar maosh to‘lash orqali oyiga 2 million rubl sarflamoqda.
Izoh (0)