Коронавирус пандемияси сабаб бутун дунёда жорий этилган карантин давлатлар иқтисодиётига жиддий зарар етказмоқда. Бироқ янги коронавирус айрим ҳолларда сайёрага ижобий таъсир ҳам кўрсатяпти. Йирик корхоналар атмосферага чиқариладиган зарарли газлар миқдорини камайтирган, кўплаб шаҳарларда шовқин даражаси сезиларли даражада тушиб кетган, деб ёзади Hi-Tech.Mail.ru.
Мичиган университети тадқиқотчилари 5894 кишининг Apple Watch ва iPhone қурилмаларидаги шовқин даражасига оид маълумотларни ўрганиб чиқди. Маълум бўлишича, март ва апрель ойида шовқиннинг ўртача суткалик даражаси 2020 йилнинг январь ҳамда февралига қараганда 3 децибелга (дБ) пасайган. Карантин бошлангунига қадар унинг даражаси 73,2 дБ бўлган, ундан кейин эса — 70,6. Экспертларнинг таъкидлашича, 70 дБ дан юқори овоз инсоннинг эшитиш қобилиятига салбий таъсир кўрсатади.
Олимларнинг фикрича, вируснинг кўплаб салбий оқибатларига қарамай, умумий шовқиннинг пасайиши — инсонлар соғлиғи учун фойдали. Мунтазам шовқин эшитиш қобилиятини ёмонлаштиради, юрак қон-томир касалликларини юзага келтиради.
Олимлар томонидан ўрганилган маълумотлар АҚШнинг тўртта штатида истиқомат қилувчи фуқароларга тегишли ва шовқин даражаси ҳар бир ҳудудда жорий этилган карантин чекловларига боғлиқ. Хусусан, уларнинг айримларида бошқа штатлар ёки давлатларга қараганда қаттиқроқ чекловлар ўрнатилган эди. Масалан, Нью-Йорк ва Калифорниядаги чекловлар узоқ вақт давом этди.
Изоҳ (0)