"Ўзбекистон Республикасида хизмат кўрсатган фан арбоби», қишлоқ хўжалиги фанлари доктори, профессор, академик Шавкат Акмалхонов 2020 йил 11 октябрь куни 87 ёшида вафот этди. Бу ҳақда Инновацион ривожланиш вазирлиги хабар берди.

Фото: Инновацион ривожланиш вазирлиги

Акмалхонов Шавкат Асамович 1933 йил 18 август куни Тошкент шаҳрида зиёлилар оиласида таваллуд топган. У 1956 йилда Самарқанд қишлоқ хўжалик институтини олим зоотехник мутахассислиги бўйича тамомлаган.

Ўзбекистонда чорвачилик соҳаси ривожланишида ўзининг катта ҳиссасини қўшган олим ўз меҳнати фаолияти давомида 10 га яқин докторлик ишига, 20 дан ортиқ номзодлик ишига раҳбарлик ва оппонентлик қилган.

«Инновацион ривожланиш вазирлиги жамоаси ва раҳбарияти Шавкат Акмалхоновнинг бевақт вафоти муносабати билан унинг яқинлари ва ҳамкасбларига чуқур ҳамдардлик билдиради», — дейилади вазирлик хабарида.

Вазирлик Шавкат Акмалхоновнинг вафоти сабабини маълум қилмаган.

Эслатиб ўтамиз, фалсафа, адабиёт ва педагогика фанлари бўйича таниқли олим, Ўзбекистон Фанлар академиясининг академиги Жуманазар Базарбаев 25 сентябрь куни 87 ёшида вафот этганди. Тиббиёт фанлари доктори, профессор Назира Салоҳова 77 ёшида вафот этгани ҳақида ҳам хабар берилганди.

Шунингдек, Ўзбекистон Республикаси Фанлар академияси академиги, адабиётшунос олим Тўра Мирзаев 29 сентябрь куни 84 ёшида, Ўзбекистонда хизмат кўрсатган фан арбоби, Ўзбекистон Республикаси Фанлар академияси академиги Турсунбой Рашидов 7 октябрь куни 86 ёшида вафот этганди.