Жиноят ишлари бўйича Самарқанд шаҳар судида хорижга ишга жўнатиш баҳонасида фуқароларни чув туширган «Amilee Bahora» хусусий бандлик агентлиги МЧЖ раҳбарларига суд ҳукми ўқилди. Бу ҳақда Олий суд матбуот хизматига таяниб, «Kun.uz» хабар берди.
Олий суд матбуот хизматининг маълум қилишича, судланувчилар — «Amilee Bahora» хусусий бандлик агентлиги МЧЖ таъсисчиси ва ҳуқуқшуноси, 1970 йилда туғилган Жаҳонгир Тоҳиров ва агентлик таъсисчиси ҳамда раҳбари, 1972 йилда туғилган Баҳора Рауповага нисбатан суд ҳукми ўқилган.
Ушбу жиноят иши бўйича якуний суд мажлиси 2020 йил 5 октябрь куни жиноят ишлари бўйича Самарқанд шаҳар суди биносида очиқ суд мажлисида, раислик қилувчи судья З.Аҳмедова, судья ёрдамчиси З.Файзиев ва Х.Раббимов котиблигида бўлиб ўтган.
Мазкур жиноят ишида жабрланувчилар сони 300 нафардан ошиқроқни ташкил этган.
Суд ҳукмига кўра, судланувчи Жаҳонгир Тоҳиров Жиноят кодексининг 168-моддаси 3-қисми «б» банди (такроран ёки хавфли рецидивист томонидан содир этилган фирибгарлик), 189-моддаси 1-қисми (товарлар савдоси ёки хизмат кўрсатиш қоидаларини жуда кўп миқдордаги қийматда бузиш) ва 228-моддаси 1-қисмида (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) назарда тутилган жиноятни содир қилганликда айбли деб топилди ва унга Жиноят кодексининг 57-моддасини қўллаб, 7 йил муддатга озодликдан маҳрум қилиш жазоси тайинланди. Жазони умумий тартибли колонияда ўташ белгиланди.
Судланувчи Баҳора Раупова Жиноят кодексининг 168-моддаси 3-қисми «б», «в» бандлари (такроран ёки хавфли рецидивист томонидан хизмат мавқейидан фойдаланиб содир этилган фирибгарлик) ва 189-моддаси 1-қисмида (товарлар савдоси ёки хизмат кўрсатиш қоидаларини жуда кўп миқдордаги қийматда бузиш) назарда тутилган жиноятни содир қилганликда айбли деб топилди ва Жиноят кодексининг 57-моддасини қўллаб, 5 йил муддатга озодликдан маҳрум қилиш жазоси тайинланди. Жазони умумий тартибли колонияда ўташ белгиланди.
Бундан ташқари, суд ҳукмига кўра, судланувчиларга тегишли бўлган Самарқанд шаҳар Регистон кўчасидаги 9-уйнинг 1-қаватида жойлашган ва 1,317 миллиард сўмга баҳоланган 116,95 квадрат метр офис биноси кимошди савдоси орқали сотувга қўйилиб, судланувчиларга алданган фуқароларга тақсимлаб берилиши ва ортиб қолган маблағ Жаҳонгир Тоҳиров ва Баҳора Рауповага қайтариб берилиши белгиланди.
«Kun.uz»нинг ёзишича, мазкур агентлик фаолияти ортидан келиб чиққан норозиликлар бўйича 2019 йил декабрь ойида, 2020 йил январь ойида мамлакатнинг турли ҳудудларидан бўлган кўплаб фуқаролар мурожаат қилган. Ана ўша мурожаатларда кўплаб фуқаролар «Amilee Bahora» хусусий бандлик агентлиги МЧЖ фаолиятидан норози бўлган.
Кейинчалик кўплаб фуқароларнинг ҳуқуқни ҳимоя қилиш органларига қилган мурожаатлари ортидан мазкур агентликнинг лицензияси 2020 йил 4 март кунидан бошлаб Бандлик ва меҳнат муносабатлари вазирлиги томонидан тўхтатиб қўйилган.
Аввалроқ Самарқандда фуқароларни чет элга юборишни ваъда қилиб, қарийб 787 миллион сўм пулни ўзлаштирган Consort хусусий бандлик агентлиги мансабдорларига жиноят иши қўзғатилгани ҳақида хабар берилганди.