Jizzakh Auto компанияси 2020 йилнинг октябрь ойида Volkswagen концернига тегишли Skoda брендини тақдим этади. Бу ҳақда Skoda Uzbekistan компанияси маълум қилди.
Хабар берилишича, Ўзбекистонда Skoda брендининг илк автомобили 2021 йилга мансуб Skoda Kodiaq тўлиқ ўлчамли йўлтанламаси бўлади. У икки хил комплектацияда тақдим этилади: беш ўриндиқли Ambition ва етти ўриндиқли Style.
Маҳаллий бозор учун ушбу модель сиғими икки литрли, қуввати 180 от кучига эга бўлган турбо двигатель, етти босқичли роботлаштирилган тезлик узатиш қутиси, тўлиқ узатма ва панорама люк билан тақдим этилади.
Компания томонидан маълум қилинишича, дилерлик тизими ва хизмат кўрсатиш жараёнларига алоҳида эътибор бериш режалаштирилган. Шу сабабли Тошкент шаҳрида иккита Skoda дилерлик маркази очилишига тайёргарлик кўрилмоқда, Қўқонда эса яна битта дилерлик марказининг қурилиш ишлари якунланмоқда. Ушбу автосалонларда автомобиль харид қилиш, кафолат ва сотувдан кейинги сервис хизматларидан фойдаланиш мумкин бўлади.
Қайд этилишича, автомобиллар нархлари октябрь ойида эълон қилинади, автомобиль қийматининг бир қисимни тўлаб, олдиндан буюртма бериш мумкин бўлади. Дастлабки автомобилларнинг етказиб берилиши 2020 йилнинг ноябрь ойида амалга оширилиши режалаштирилган.
Skoda Kodiaq’нинг 2020 йил октябрь ойида Ўзбекистон бозорига сотувга чиқиши кутилаётгани ҳақида аввалроқ хабар берилганди. Президент қарорига кўра, биринчи босқичда — 2020−2021 йилларда Volkswagen ва Skoda автомобилларини Ўзбекистонга тайёр ҳолда олиб кириш режалаштирилган. Фарғона, Тошкент ва Жиззахда дилерлик ва хизмат кўрсатиш тармоқлари ишга туширилади. Иккинчи босқичда — 2022 йилдан бошлаб тўлиқ ишлаб чиқариш цикли ташкил қилинади ва инвестициялар ҳажми, автомобиль экспорти масалалари ҳам ҳал қилинади.
Аввалроқ Жиззахдаги автомобиль заводда йиғиладиган Kia автомобиллари — Seltos ва К5 моделларининг нархлари эълон қилинганди.
Изоҳ (0)