Коррупцияга қарши курашиш агентлиги директори Акмал Бурҳонов 6 октябрь куни агентликда ташкил этилган матбуот анжуманида давлат идора ва ташкилотларида коррупцияга қарши жорий этиладиган комплаенс-назорат тизимининг жавобгарлик ва жазолаш чораларига тўхталиб ўтди.
Идоралар ўзида «комплаенс-назорат» тизимини жорий этганидан сўнг қўлида ISO 37001 халқаро стандарт сертификати бўлиши керак. Масалан, комплаенс-назорат тизими жорий этилса, Олмалиқ ҳокими ўғлининг хатти-ҳаракати учун жавоб берадиган бўлса, камида ўша ҳоким истеъфо берадиган бўлади. Бу жавобгарлик чораси. Иккинчи масала, автоматик равишда мана шу қоидалар белгиланадиган тизим юритилади. Жавобгарликни кучайтириш, жазолаш – бу айсбергнинг энг тепаси. Энг пастида биз муаммо нимадан келиб чиқаётганини комплекс кўришимиз керак. Ҳозиргача коррупция фақат ҳуқуқни муҳофаза қилиш идораларида, деб билардик, ички назорат фақат уларда эди. Кейинги йилдан нафақат коррупция хавфи юқори бўлган идоралар, балки барча вазирлик-идораларда комплаенс-назорат жорий этиш, керак бўлса, алоҳида тузилма ташкил қилиш масаласи турибди.
Акмал Бурҳонов, Коррупцияга қарши курашиш агентлиги директори
Мавзуга доир: Олмалиқ шаҳри ҳокимининг ўғли Тошкентда катта тезликда машина ҳайдади. Ҳоким ўғлининг ишига изоҳ берди
Маълумот учун, комплаенс-назорат тизими давлат бошқарув органларида коррупция ҳолатларига қарши курашиш, коррупцион хавф-хатарларни аниқлаш ва олдини олиш ҳамда уларга чек қўйиш мақсадида ташкил этиладиган ички назорат тизими.
Ўзбекистон Президенти Шавкат Мирзиёев 11 февраль куни коррупцияга қарши курашиш ҳамда жамоатчилик назорати тизимларини такомиллаштириш масалалари бўйича йиғилиш ўтказган эди. Унда коррупцияга қарши кураш чораларидан бири сифатида Адлия вазирлиги ва Бош прокуратурага БМТ Тараққиёт дастури билан ҳамкорликда вазирлик, компания ва ҳокимликларда ички коррупцияга қарши чораларни ишлаб чиқувчи ва амалга оширувчи комплаенс-назорат тизимини жорий этиш вазифаси қўйилган.
Шу кунгача Ҳисоб палатаси, Бош прокуратура, Адлия вазирлиги ва бошқа ташкилотлар билан коррупция хавфи энг юқори бўлган 26 та давлат ва хўжалик бошқаруви органлари, банклар, «Ўзбекнефтгаз», газ билан боғлиқ идоралар, Қурилиш вазирлиги, таълим соҳасидаги муассасаларда коррупцияга қарши комплаенс-назорат тизимини жорий этиш бўйича «йўл хариталари» ишлаб чиқилиб, тақдим этилгани айтилди.
Эслатиб ўтамиз, комплаенс тизимини жорий этиш ишлари илк марта 2019 йилнинг ноябрида Бош прокуратура томонидан «Ўзбекнефтгаз» ва «Ўзкимёсаноат» компанияларида бошланган. Монополияга қарши курашиш қўмитаси ишлаб чиққан ҳукумат қарори лойиҳасида эса 2021 йил 1 январдан бошлаб тажриба (синов) тариқасида давлат иштирокидаги айрим корхоналарда монополияга қарши комплаенс тизимини жорий этиш мажбурий ҳисобланиши белгиланган эди. Кейинроқ 2020 йил 1 октябрга қадар нефть-газ тармоғидаги барча корхоналарда коррупцияга қарши комплаенс-назорат тизими жорий этилиши ҳақида хабар берилган.
