Шавкат Мирзиёев 5 октябрь куни Тожикистон президенти Эмомали Раҳмон билан телефон орқали мулоқот қилди, деб хабар бермоқда Президент матбуот хизмати.

Фото: Президент матбуот хизмати

Қайд этилишича, суҳбат аввалида давлат раҳбари Тожикистон президентини туғилган куни билан табриклаб, унга мустаҳкам соғлик, фаровонлик ва янги муваффақиятлар тилади.

Тожикистон томони коронавирусга қарши курашда кўрсатилган амалий ёрдам учун миннатдорлик билдирди.

Давлат раҳбарлари ўтган ойда бўлиб ўтган қатор икки томонлама тадбирларнинг самарали натижаларини юқори баҳолади. Хусусан, ҳукуматлараро комиссиянинг навбатдаги мажлиси ҳамда бизнес-форум, илмий-амалий конференция, парламент аъзолари ва зиёлилар учрашувлари муваффақиятли ўтказилди, қўшма ишлаб чиқариш қувватлари ва ижтимоий объектлар очилди.

Ўзбекистон ва Тожикистон президентлари икки мамлакат ҳукуматларига кенг кўламли ҳамкорликни кенгайтириш ҳамда бўлажак саммитнинг янги кун тартибини ҳар томонлама пухта тайёрлаш бўйича «йўл харита»сини ишлаб чиқишга топшириқ берди.

Шунингдек, халқаро сиёсат ва минтақавий ҳамкорликнинг долзарб масалалари юзасидан ҳам фикр алмашилди.

Телефон мулоқоти сўнгида Шавкат Мирзиёев Эмомали Раҳмонга 2020 йил 11 октябрь куни бўлиб ўтадиган президент сайлови муваффақиятли ўтишини тилади.

Маълумот учун, Тожикистоннинг амалдаги президенти Имомали Раҳмон мамлакатни 1994 йилдан бери узлуксиз бошқариб келмоқда. Душанбеда 26 август куни бўлиб ўтган Тожикистон Мустақил касаба уюшмалари федерациясининг навбатдаги қурултойида Эмомали Раҳмон президентлик сайловига номзод сифатида илгари сурилган. Унинг тўнғич ўғли Рустам Эмомали 17 апрель куни Мажлиси миллий (Тожикистон парламенти юқори палатаси) спикери этиб сайланганди. Айни пайтда у 32 ёшда. 2016 йилда мамлакат конституциясига ўзгартириш киритилган бўлиб, президентликка номзоднинг ёши 35 ёшдан 30 ёшгача қисқартирилган. Бу унга навбатдаги президент сайловларида иштирок этиш имконини беради.

Аввалроқ Душанбеда 14—15 сентябрь кунлари Шавкат Мирзиёев ва Эмомали Раҳмоннинг ўзбек-тожик муносабатларини мустаҳкамлашдаги ўрни муҳокама қилингани, 28–29 сентябрь кунлари Тожикистон ва Ўзбекистон ўртасида савдо-иқтисодий, ижтимоий-маданий ҳамкорлик масалалари бўйича қўшма қўмитанинг навбатдаги Мажлиси бўлиб ўтгани хабар берилганди.