Жондор тумани ҳокими: Туманимиз «қониқарсиз» деб топилишига асосий сабаб — эътиборсизлигимиз

Бухоро вилоятининг Жондор тумани Президент Шавкат Мирзиёев раислигида бўлиб ўтган видеоселектор йиғилишида 33 та «қониқарсиз» туманнинг бири сифатида тилга олинганди. Халқ депутатлари туман кенгашининг навбатдаги сессиясида туман ҳокими ҳудуднинг «қониқарсиз» аҳволга тушганига изоҳ берди, дея хабар берди «Дарё» мухбири.

Жондор тумани ҳокими Камол Камолов сессияда сўз олиб, туман раҳбари сифатида ҳудуднинг иқтисодий кўрсаткичларини 2020 йил охиригача яхшилаб, «ўрта», кейинги йилда эса «яхши»га ўтказишга ваъда берди.

Ҳокимга кўра, туманнинг иқтисодий салоҳияти 23 та йўналиш бўйича таҳлил қилинган ва шундан 9 та йўналишда камчиликлар борлиги аниқланган. Ҳоким туманнинг «қолоқ»лигини кўрсаткичлар ва қилинган ишлар давлат статистика қўмитасига берилмай қолгани билан изоҳлади.

«Туманнинг ‘қониқарсиз’ ҳудудга тушиб қолишига асосий сабаблардан бири бу — эътиборсизлик. Мен ва ўринбосарларим қайд этилаётган кўрсаткич ва рақамлар Давлат статистика қўмитасида қандай акс этаётгани билан қизиқмаганмиз. Натижада статистикада икки хил рақам акс этган. Биргина экспорт борасидаги англашилмовчиликка эътибор қаратайлик. Ўтган йил туманда 8 миллион доллар миқдорида экспорт амалга оширилган. Аммо статистикада бошқа рақам қайд этилган. Бу эса қилинган ишлар ҳажмини ‘нолъга чиқарган. Мана шундай эътиборсизлигимиз ва ҳисоботни назорат қилмаганимиз сабабли вазият шу даражага етди», — деди Камол Камолов.

Туман ҳокими «Дарё» мухбирининг «Туман ‘қониқарсиз’лар рўйхатига тушиб қолишига сизнинг ҳам айбингиз бор. Ҳоким сифатида қандай камчиликларга йўл қўйдим деб ўйлайсиз? Қўл остингиздагиларга қай даражада ишондингиз ва қайси соҳа ходимлари сизга панд берди?» деган саволига «Туманимизни ижтимоий-иқтисодий ривожлантириш йўлида мавжуд имкониятларимизни ишга солиб, бор куч-ғайратимиз билан барча сектор раҳбарлари, туман фаоллари, депутатлар билан биргаликда ишларни тўғри ташкиллаштириб, баҳолашнинг рейтинг кўрсаткичларига кўра, ‘қониқарсиз’лар рўйхатидан ‘ўрта’га ўтказиб, сизларнинг ва давлатимиз раҳбарининг ишончини оқлаймиз. Ҳоким сифатида белгилаб берилган вазифалар ва тавсиялар ўз вақтида ҳамда тўлиқ ижро этилишига ваъда бераман», — деди.

Сессияда сўз олган вилоятнинг собиқ ҳокими, вилоят кенгаши депутати Самойдин Ҳусейнов туманнинг «қониқарсиз»лар рўйхатига тушиб қолганини шармандалик, деб атади.

«Гапирмайман дегандим, аммо ичимда қолиб кетганимдан кўра айтганим маъқулроқ бўлса керак. Жондор тумани нега республикада ‘қолоқ’ туманлар сафидан ўрин олди? Бу ҳолатни шахсан мен шармандалик, деб баҳолайман. Чунки Жондор халқи меҳнаткаш, ҳунарманд, деҳқончиликда пешқадам — имкониятлари чексиз бўлган ҳудуд. Туманнинг шундай ҳолатга тушиши сабабларини чуқурроқ таҳлил қилиш керак. Хафа бўлмайсизлар, ҳатто, ўзим ҳам уялиб турибман. Бугунги сессияда ҳеч бирингизнинг жавобингиздан қониқиш ҳосил қилмадик. Вазият фақат ўзини оқлаш билангина ўтказилди. Эътибор бермаган эканмиз, статистика бундай қилибди, у бундай қилибди, деган гаплар айтилди. Бунақа бўлиши мумкин эмас. Бугунги сессиянинг вазифаси жуда катта. Сессияда тик турган сектор раҳбарлари бундан кейин раҳбарлик қила оладими ёки йўқми, шуни очиқ айтиши керак. Сессиянинг асосий мақсади ҳам мана шу. Ҳатто чора-тадбирлар дастури ҳам тўғри тузилмаган. Бу аҳволда натижага эришиб бўлмайди», — деди Самойдин Ҳусейнов.

Шундан сўнг Жондор тумани ҳокими Камол Камолов бугундан бошлаб ўзгаришини айтиб, «қониқарсиз» туман учун аҳолидан узр сўради.

«Тўғриси, раҳбарларни аяш, андиша қилиш туманни шу аҳволга солди. Энди раҳбарларга нисбатан талабчанлик бўлади. Бугундан тўнимизни тескари кийиб ишни давом эттирамиз. Сессиямизда Олий Мажлис Қонунчилик палатаси вакили бор. Айтилаётган ҳар бир гапимиз ёзиб борилмоқда. Агар ваъдаларим қуруқ гап бўлиб қолса, мен ҳам, қўл остимдаги ходимлар ҳам лавозимимиз билан жавоб беришга тайёрмиз!», — деди ҳоким.