Азарнинг жароҳатлари, Каземирога ўринбосар йўқлиги ва икки йилдан бери таниб бўлмаётган Иско. Зидан жорий мавсумда ҳал қилиши керак бўлган бешта муаммо

«Реал»нинг ёзги трансферлардаги асосий мақсадларидан бири Каземирога ўринбосар топишдан иборат эди. Бунга эса етарлича сабаблар бор: бразилиялик ўтган мавсумда «Реал» сафида энг кўп дақиқа ўтказган футболчи бўлди – 4080. Унинг жароҳат ва дисквалификациялари эса Зиданни қийин вазиятлар тушириб қўйди. Зидан уни муҳим ўйинларга асраш учун захирада қолдирган ўйинларда жамоа муваффақиятсизликларга учрарди.

Ушбу бўшлиқни тўлдириш учун эса клуб Эдуардо Камавингани вариантини кўриб чиқаётганди. Бироқ барча соҳаларда бўлгани каби пандемия бу режани амалга оширишга тўсқинлик қилди. Зидан Каземирога альтернатив вариантсиз янги мавсумга киришди. Тўғри, ушбу позицияда унинг ўрнини тўлдириши мумкин бўлган Вальверде бор, бироқ Каземиронинг майдонда бажарадиган фойдали иш коэффициенти ёш Вальверденикидан анча юқори туради.

Фақат Бензема гол урмоқда

Карим Бенземанинг голлари «Реал»га Ла Лига чемпионлигига олиб келди, чунки Эден Азар, Винисиус Жуниор, Гарет Бэйл, Марко Асенсио ва Исконинг ҳиссалари жароҳат ёки ёмон спорт формаси туфайли уникига тенг кела олмайди. Француз ҳатто мавсум сўнгига қадар Пичичи соврини (Marca газетаси томонидан мавсумнинг энг яхши тўпурарига топшириладиган мукофот – «Дарё») учун курашди. Шу тариқа мухлислар ниҳоят йиллар давомида Роналдунинг соясида ўз даражасида ўйнай олмаган, голеадорни кўрди.

Бироқ унга деярли рақобатчи йўқ, ўтган йили харид қилинган Лука Йович ўзига билдирилган ишончни оқлолмаяпти. «Айнтрахт»даги Йовичдан асар ҳам йўқ. Ушбу муаммони ҳал этиш учун клуб раҳбарияти Ҳоланд, Мане, Мбаппе ва бир қатор бошқа номдор ҳужумчилар номзодини кўриб чиқди, бироқ пандемия сабаб буларнинг барчаси миш-мишлигича қолиб кетди.

Шундай экан, Зидан жорий мавсумда қандай бўлмасин Йовични қайта созлаш йўлини топиши керак (мажбурлигидан), акс ҳолда Бензема яна «қаймоқранглилар»ни бир ўзи тортиши керак бўлади.

Икки йилдан бери таниб бўлмаётган Иско

Ўтган трансфер ойналарида тез-тез содир бўлганидек, Исконинг «Бернабеу»ни тарк этиши билан боғлиқ миш-мишлар кўп бўлди, аммо аслида таклифлар бўлмагани ва футболчининг ўзи ҳам иссиқ жойидан кетишни истамагани маълум бўлди. Таклифлар, асосан, унинг формасига боғлиқ, ва шуни айтиш керакки, аввалги «технар» ҳақиқатан ҳам икки йилдан бери ўз даражасида ўйнай олмаяпти.

Зидан ҳар доим ҳам Искони ўзининг ишончли ўйинчиси сифатида кўрмаган, аммо у бу мавсумда испаниялик футболчидан максимал даражада фойдаланишга ҳаракат қилишдан бошқа иложи йўқлигини яхши тушуниб турибди. Мадрид клуби айнан ушбу мавсумда Исконинг паслари ва тажрибасига эҳтиёж сезади. Ундан қандай фойдаланиш эса фақат ва фақат Зиданга боғлиқ.

Ўнг қанот ҳимоясидаги муаммолар

Каземиронинг таянч зонасидаги «монополия»си ҳимоянинг ўнг қанотида кўп йиллар давомида юқори даражада ўйнаган Дани Карвахалнинг шахсида такрорланади, у шунчаки бу позицияни ўзиники қилиб олган. Бироқ йиллар ўз сўзини айтмоқда ва у кўп жабҳаларда ёш ва ғайратли ҳужумчиларга қаршилик кўрсата олмаяпти. Карвахалнинг ўзи ҳам ўринбосар топилса, бундан норози бўлмаган бўларди. Бу ҳолатда Альваро Одриосолага «Бавария»даги ижарадан сўнг яна бир имконият берилади, агар Лукас Васкес (ярим ҳимоячи) Қатарга кўчиб ўтмайдиган бўлса, ҳимоявий ролда синаб кўрилиши мумкин.

Азар ва унинг жароҳат(лар)и

Перес Роналду «Ювентус»га кетиб қолганидан сўнг, Азарни олиб келиб, мухлислар олдида юзини ёруғ қилиб, бироз тин олганди. Аммо бельгиялик футболчининг Испаниядаги дебют мавсуми том маънода ёмон туш каби ўтди, уни йил давомида тўпиғидаги жароҳатлар тинч қўймади.

Ҳозирда кўпчилик Азарнинг «Челси»даги формасини тиклай олишига шубҳа қилмоқда. У жуда кўп ва қайта-қайта жароҳат олди. Ёши эса аллақачон 30 га яқинлашиб қолган. Бельгиялик футболчи дастлабки икки турни ўтказиб юборишга ҳам улгурди. Зидан эса ҳамон унинг тикланишига умид қилмоқда.

Шуни алоҳида таъкидлаш лозимки, Азар ўйин тизгинини буткул ўзгартириб юбора оладиган ва жамоа у учун ўйнайдиган футболчилар сирасига киради. Агар у қайтадиган бўлса, Мадридни яна Европанинг энг кучли жамоасига айлантиришга қодир.

«Реал»ни ҳеч кимни сотиб олмагани ҳамда Винисиус ва Родригога ҳали тўлиқ ишониб бўлмаслигини ҳисобга олиб, Галактикосда ўз тиббий ходимларига ишонишдан бошқа чора йўқ.