Вашингтон округ суди президенти Дональд Трампнинг мамлакатда TikTok иловасини юклаб олишни тақиқловчи фармонига вақтинча тўсиқ қўйди, деб хабар бермоқда «РБК» The Wall Street Journal’га таяниб. Суд қарорни ушбу қарор тақиқ кучга киришидан бир неча соат аввал қабул қилган.
Қайд этилишича, суд қарори TikTok’га хизматни Oracle ва Walmart билан сотиш бўйича тугалланмаган битимга АҚШ ва Хитой расмийларидан розилик олиш учун кўпроқ вақт беради.
Трамп фармонига вақтинча тўсиқ қўйиш ҳақида ByteDance компанияси даъво аризаси киритган.
АҚШ президенти ушбу фармонни 7 август куни имзолаганди. Трамп администрацияси ушбу илова америкаликларнинг шахсий маълумотларини Хитойга узатиши мумкин, деган фикрда. Сервис эгаси — ByteDance компанияси бу айбловларни рад этмоқда.
Трамп АҚШ фуқароларининг хавфсизлигини таъминлаш мақсадида TikTok’ни Америка компаниясига, масалан, Microsoft’га сотишни талаб қилган. Бундай битим 15 сентябрга қадар амалга ошмаса, TikTok «бизнесдан чиқиши» билан қўрқитган. Кейинчалик, АҚШ савдо вазирлиги TikTok ва WeChat хизматларини Америка маркетплейлистлари орқали сотиш ва қўллаб-қувватлаш тақиқланганини эълон қилган.
20 сентябрь куни Трамп TikTok Oracle корпорацияси томонидан сотиб олинишини маъқуллади. 12 ноябргача битим тузилмаса, АҚШ ҳукумати мамлакатда TikTok фаолиятини чеклашни бошламоқчи.
Изоҳ (0)