22 сентябрда Польша миллий хотира институти (IPN) Facebook’даги саҳифасида 1964 йилнинг февраль ойида Жеймс Альберт Бонд исм-шарифли британиялик 36 ёшли эркакнинг мамлакатга келганини ошкор этди. У Британия элчихонасининг ҳарбий вакилида архивариус лавозимида ишлай бошлаган. Бонд тезда контрразведка идораларининг эътиборини тортган. Эркакнинг жосус бўлиши мумкинлиги гумон қилиниб, уни кузатиш ишлари бошланган.

Жеймс Бонд ролини ижро этган актёр Шон Коннери

Фото: «Pikabu.ru»

У вақтда Жеймс Бонд ҳақидаги 14 та китобнинг 11 таси чиқиб бўлган (Ян Флемингнинг 007 рақамли жосус ҳақидаги «Royal казиноси» китоби 1953 йилда нашр қилинганди) ва бондиананинг иккита экранизацияси, яъни Шон Коннери бош ролни ижро қилган «Доктор Ноу» ҳамда «Россиядан муҳаббат билан» номли фильмлар тақдим қилинганди.

The Telegraph нашрининг ёзишича, Жеймс Альберт Бонд 1928 йилда Девон графлигининг Бидефорд шаҳарчасида туғилган. Унинг ота-онаси қишлоқ хўжалигида банд бўлган. 1954 йилда у Жанетт Такки исмли аёлга уйланган ва бир нафар ўғил фарзандли бўлган. Бонд ҳарбий хизматда деярли 60 йил ишлаган. У 2005 йилда вафот этган.

Польша миллий хотира институти директори Маржена Крук Reuters’га берган интервьюсида бир вақтлар мамлакатга келган Бонд ҳам адабий қаҳрамон каби аёлларни, ичкиликни яхши кўрган, бироқ кинодаги персонаж каби мартинини эмас, аксинча пиво ичишни афзал билган.

Бонднинг рафиқаси Жанетт Такки The Telegraph’га берган интервьюсида эрининг ростан ҳам Британия жосуси бўлгани ҳақида гапирган. Бироқ жуфтлик Польшага келган вақтида аёл турмуш ўртоғининг сирли ишлар билан шуғулланганини сезмаган. Жанетт хоним оила Польшага келган вақтида улар доимий равишда кузатув остида бўлганини эслаган.

Польша архивларидаги маълумотлар бўйича, Бонд икки марта Белосток ҳамда Ольштинда СССР назорати остидаги ҳарбий объектларга киришга уринган. Аммо маҳаллий аҳоли вакиллари билан мулоқот ўрнатишга уринмаган. 1965 йилда Бонд Польшани тарк этган. Жеймс Бонд бевасининг айтишича, ушбу қарорга эрининг лавозими кўтарилгани сабаб бўлган.

Ўша вақтда Жеймс Альберт Бондни нима учун Польшага юборишгани ҳанузгача аниқланмаган. Ушбу маълумот Британия архивларидаги маълумотларнинг махфийлик муҳри олиб ташланмагунига қадар сир бўлиб қолади. Польша миллий хотира институти бунинг ўзига хос ҳазил бўлгани ёки Буюк Британия қироллиги ушбу қарор орқали махсус разведка идораларини чалғитишга уринган бўлиши мумкинлигини тахмин қилган.