ИИВ карантин даврида машиналар жарима майдончасида ноқонуний ушлаб турилганини яшириб, энди буни қонунийлаштирмоқчи. Депутатлар изоҳ талаб қилмоқда
Ўзбекистон Либерал Демократик партиясининг сиёсий фракцияси 23 сентябрь кунги йиғилишида Олий Мажлис Қонунчилик палатасига Ички ишлар вазирлиги ташаббуси билан Вазирлар Маҳкамаси томонидан киритилган «Ўзбекистон Республикаси Маъмурий жавобгарлик тўғрисидаги кодексга ўзгартириш ва қўшимчалар киритиш ҳақида»ги қонун лойиҳаси муҳокама қилинди, дея хабар қилди Қонунчилик палатаси депутати Дониёр Ғаниев.
Унинг сўзларига кўра, мазкур қонун лойиҳасида Маъмурий жавобгарлик тўғрисидаги кодекснинг 291-моддасига ўзгартириш киритиш таклиф этилган. Бунда ушбу кодекснинг 54-моддаси иккинчи қисмида назарда тутилган ҳуқуқбузарлик, яъни эпидемияларга қарши кураш қоидаларини бузиш борасидаги маъмурий ҳуқуқбузарликлар содир этиб ҳаракатланаётган транспорт воситаларини вақтинча ушлаб туриш мақсадида жарима майдонига жойлаштириш тартибини жорий этиш таклиф қилинмоқда.
«Бундан кўриниб турибдики, амалдаги Маъмурий жавобгарлик тўғрисидаги кодекс талабларига асосан фуқаро автомобилини ушбу кодекснинг 54-моддаси, яъни эпидемияга қарши кураш талабини бузганлик учун жарима майдончасида мажбурий ушлаб туриш мумкин эмас», — деб ёзади депутат.
Депутат ИИВ вакили берган маълумотга асосланиб, мамлакатда карантин чекловлари жорий этилган муддат давомида 26 мингдан ортиқ ушбу турдаги қоидабузарликлар аниқлангани ва транспорт воситалари жарима майдонларига вақтинча ушлаб туриш учун олиб кирилганини маълум қилди. Бироқ ИИВ ЙҲХББ маълумотларига кўра, 15 сентябргача карантин қоидалари бузилгани учун 155,8 мингдан ортиқ автомобиль жарима майдонларига жойлаштирилган.
«Таклиф этилаётган қонун лойиҳасининг мақсадидан келиб чиқадиган бўлсак, бугунги кунга қадар ички ишлар ходимлари томонидан Маъмурий жавобгарлик тўғрисидаги кодекснинг 54-моддаси асосида 26 мингдан ортиқ транспорт воситаси жарима майдонларига ноқонуний тарзда олиб кирилганлигини англатадими? Карантин қоидалари бузилганда автомашина жарима майдонига қўйилишини қонуний деб жар солган ИИВ ушбу қонун лойиҳаси билан энди бу ҳолатларни нотўғри эканлигини тан олмоқдами?» — дейди парламент аъзоси.
«Агар бундай бўлмаса, хўш, унда нима сабабдан кодексга ўзгартириш киритиш таклифи илгари сурилмоқда? Бу шу кунга қадар амалга оширилган, лекин қонуний асосга эга бўлмаган хатоликларни тўғрилаш учунми? Нима учун бу таклиф автомобиллар ҳаракатига доир карантин чекловлари бекор қилинган вақтда илгари сурилмоқда?» — дея яна савол беришда давом этади депутат.
Дониёр Ғаниевнинг таъкидлашича, агар Ички ишлар вазирлиги қонун лойиҳасида таклиф этилаётган ўзгаришларни ўз вазифаларини бажариш ва қонунчилик даражасида тегишли қонунчилик базасини яратиш учун муҳим деб ҳисобласа, парламент буни қўллаб-қувватлашга тайёр. Шу билан бирга, у қонунчилик ҳужжатлари ва уларнинг бажарилиши ўзаро бир-бирига мос келиши керак, биринчи навбатда қонун устуворлигини таъминлаш керак, деб ҳисоблайди у.
«Шу боис таклиф қилинаётган қонун лойиҳаси маъқулланишидан олдин ИИВ ҳам ўз хатосини тан олиши ва бугунги кунга қадар Маъмурий жавобгарлик тўғрисидаги кодекснинг 54-моддаси асосида транспорт воситаларини жарима майдонларида ушлаб туриш ортидан фуқаролар томонидан тўланган маблағларни қайтариши энг тўғри йўл бўлади!», — деди Дониёр Ғаниев.
Мавзуга доир: Фарғонада стикери йўқлиги сабаб машинаси жарима майдонига қўйилган фуқаро ўзини осишга уринди
«Эпидемияга қарши кураш қоидаларини бузганлик учун автомобиль жарима майдонига қўйилмаслиги ҳақидаги қонун талабини айтганимда бир қатор идоралар бундан кўз юмиб, йўқ ҳаммаси қонуний тўғри, деб оғзимизни ёпишга уринишган эди. Аслида буни ўрта маълумотга эга фуқаро ҳам билиб турибди», — деди Кушербаев.
Парламент аъзоси Ички ишлар вазирлиги хатони парламент орқали «жимгина» тузатишга уринаётганини тахмин қилмоқда.
«Бу қовун туширишдан жабр кўрган камида 26 мингдан ортиқ фуқаро олдида эртага ким ‘крайний’ айбдор қилинади? Депутатларми? Унда ким жарима майдонида автомобиллар ғайриқонуний ушлаб турилгани учун пул тўлайди?» — деб сўради Расул Кушербаев.
Июнь ойи ўрталарида Тошкент шаҳрининг Миробод туман маъмурий суди рухсатнома стикерисиз машина бошқарганлиги учун жаримага тортилган ҳайдовчига нисбатан маъмурий ишни бекор қилганди. Унинг автомобили жарима майдонида сақланиши ноқонуний деб топилганди.
