Toshkent shahrida 18-sentabr kuni yomg‘ir yog‘ishi kutilayotganligi sababli Toshkent davlat yuridik universiteti qoshidagi akademik litseyiga o‘qishga kirish uchun o‘tkaziladigan test sinovlari 20-sentabrga qoldirildi. Bu haqda Adliya vazirligi ma’lum qildi.
Xabar berilishicha, 2020/2021-o‘quv yilida Toshkent davlat yuridik universiteti qoshidagi akademik litseyiga o‘qishga kirish uchun o‘tkaziladigan test sinovlari 18-sentabr kuni ikki smenada (1-smena 08:00 dan 11:00 gacha, 2-smena 16:00 dan 19:00 gacha) Olmazor tumanidagi Talabalar shaharchasi sayilgohida bo‘lib o‘tishi kerak edi.
Biroq Toshkent shahrida 18-sentabr kuni yomg‘ir yog‘ishi kutilayotganligi sababli, test sinovlari 20-sentabr kuniga ko‘chirildi. Test sinovlari faqat bir smenada bo‘lib o‘tadi va soat 09:00 da boshlanadi.
Abituriyentlar test sinovlariga belgilangan vaqtdan kamida 1 soat oldin yetib kelishi kerak. Test sinovlariga kirish faqat bir joydan — “Beruniy” metro bekati oldidan amalga oshiriladi.
Eslatib o‘tamiz, O‘zbekiston OTMlariga kirish imtihonlariga isitmasi balandligi sababli kiritilmagan abituriyentlar uchun test sinovlari 17-sentabr kuni o‘tkazildi.
Izoh (0)