Россияда меҳнат фаолиятини олиб бораётган ўзбекистонлик меҳнат мигрантлари рус тилини ва меҳнат бозорида талаб юқори бўлган касб-ҳунарларни бепул ўрганиши мумкин. Бу ҳақда Ўзбекистон Бандлик ва меҳнат муносабатлари вазирлиги маълум қилди.
Фото: Ташқи меҳнат миграцияси агентлиги
Бандлик ва меҳнат муносабатлари вазирлиги Worldskills Uzbekistan ассоциацияси, Worldskills Russia иттифоқи ва Россия Халқлар дўстлиги университети билан ҳамкорликда Россияда фаолият юритаётган Ўзбекистон фуқароси бўлган меҳнат мигрантларини бепул касбга ўқитиш лойиҳасини амалга оширмоқда.
Лойиҳа доирасида меҳнат мигрантлари учун Москва, Санкт-Петербург, Қозон, Екатеринбург ва Новосибирск шаҳарларида қуйидаги йўналишлар бўйича 1 ойлик (72 соатлик) ва 2 ойлик (144 соатлик) ўқув курслари ташкил этилади:
- рус тили;
- ўз касби бўйича малака ошириш;
- янги касб ўрганиш.
Малака ошириш ва касб ўрганиш курсларида хизмат кўрсатиш, қурилиш ва компьютер технологиялари соҳасида дарс ўтилади. Курслар кундузи ва ишловчилар учун иш вақтидан кейин — 19:00 дан 22:00 гача ташкил этилади.
Курсларга ҳар куни қатнаб ўқишга имкони бўлмаганлар учун ўқув марказларида ётоқхона ташкил этилади. Курслар ва ётоқхона бўйича барча харажатлар Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан қопланади ва меҳнат мигрантлари учун бутунлай бепул.
Ўқув курслари якунида Worldskills стандартлари асосида ўқиганликни тасдиқловчи ва малака даражасини кўрсатувчи малака паспорти берилади.
Мазкур ўқув курсларида ўқимоқчи бўлган меҳнат мигрантлари қуйидаги манзилларга мурожаат қилиши мумкин:
- Бандлик ва меҳнат муносабатлари вазирлигининг Telegram’даги @uzrivoj_bot тизими;
- Ташқи меҳнат миграцияси агентлигининг +998712023355 телефон рақами;
- Ташқи меҳнат миграцияси агентлигининг Россиядаги ваколатхонасининг +79257595925 телефон рақами.
