Самарқандда уч йилдан бери низоларга сабаб бўлиб келаётган бино бузилди. Шаҳарнинг Амир Темур кўчасида жойлашган уйнинг бузилишида ОАВ вакиллари ҳам иштирок этди, дея хабар берди «Дарё» мухбири.
Маълум қилинишича, бинони бузиш ишлари 2020 йилнинг 11 сентябрь куни бўлиб ўтган.
Фуқаролик ишлари бўйича Самарқанд шаҳар судининг 2020 йил 3 июндаги очиқ суд мажлисида шаҳарнинг Амир Темур кўчасидаги 14-уйда жойлашган, шаҳарсозлик талабига жавоб бермайдиган собиқ қаҳвахона даъвогар — Самарқанд шаҳар ҳокимлиги фойдасига ҳал этилган. Бино шаҳар ҳокимлиги томонидан бузиб ташланиши белгиланган.
МИБ Самарқанд вилоят бошқармаси ахборот хизматининг маълум қилишича, Елона Воловага тегишли мазкур бино 640 миллион 815 минг сўмга баҳоланган бўлиб, маблағни Самарқанд шаҳар ҳокимлиги ҳисобидан ундириш белгиланган.
«Суд қарорига асосан, ‘Миллий банкъда Елона Волова номига ҳисоб рақам очилиб, маблағ шу ҳисоб рақамга ўтказилган. Елона Волова ёки унинг ишончли вакиллари маблағни олиши ёки унинг талабига кўра, Исроил давлатига конвертация орқали кўчириб берилиши мумкин, — дейди МИБ Самарқанд шаҳар бўлим бошлиғи ўринбосари Фарруҳ Ибрагимов. — Энди қарор ижросини давом эттириш мақсадида шаҳар ҳокимлиги билан биргаликда бинони бузиш ишлари амалга оширилмоқда. Ҳозиргача аппеляция инстанциясида иш кўрилаётган бўлса, суднинг ижро ҳаракатларини тўхтатиш тўғрисида ажрим бўлмагунга қадар ижро ҳаракатларини тўхтатишга ҳеч қандай асос йўқ. Аппеляция учун мулк вакилига почта орқали муддат берилиб, ишончнома орқали хабарнома ҳам юборилган».
Аниқланишича, ушбу нотурар бино вилоят ҳокимининг 2000 йил 14 мартдаги қарори билан маданий мерос объектлари рўйхатида қайд этилган. Аммо объект маданият ва спорт ишлари вазирлиги маданий мерос объектларини муҳофаза қилиш ва улардан фойдаланиш илмий-ишлаб чиқариш бош бошқармасининг 2010 йил 19 январдаги буйруғига асосан маданий мерос объектлар рўйхатидан чиқарилган.
«2001 йилда Самарқанд шаҳри тарихий шаҳар сифатида ЮНЕСКО рўйхатига киритилган. Ушбу бино маданий мерос объекти ҳисобланмайди, фақат бино тарихий шаҳар ҳудудида жойлашган. Бу борада тегишли қарорлар қабул қилинган ва шаҳарнинг тарихий ҳудудида бажариладиган қурилиш-таъмирлаш ишлари тегишли ташкилотлар ва ЮНЕСКО маркази билан келишган ҳолда олиб борилади», — дейди Самарқанд вилоят Маданий мерос бошқармаси бошлиғи Шуҳрат Қиличев.
Ўзини Елона Волованинг ишончли вакили деб таништирган Мақсуд Абдужабборовнинг таъкидлашича, бино бузилиши ноқонуний ва бу ҳаракат хусусий мулкка тажовуз ҳисобланади. Унинг фикрича, Маданий мерос объектларини муҳофаза қилиш инспекцияси рухсати билангина ушбу бино бузилиши мумкин.
«Бино маданий мерос объекти ҳисобланади. Уни бузиш қонунга зид. Маданий мерос бошқармасининг хулосаси олинмаган ҳолда бузиш ишлари бошланмоқда, — дейди Мақсуд Абдужабборов. — Бино эгаси Елона Волова ҳозирда Исроил давлатида ва карантин туфайли Ўзбекистонга келолмаяпти. Эгаси иштирок этмасдан мулкка нисбатан қарор чиқариш қонунга зид ҳисобланади. Қолаверса, биз ҳеч қандай товон пулини олганимиз ҳам, кўрганимиз ҳам йўқ».
МИБ Самарқанд вилоят бошқармаси ахборот хизматининг маълум қилишича, бино аллақачон маданий мерос объекти рўйхатидан чиқарилган. Бино бузилишдан олдин суд қарорида келтирилган тўлов маблағ ҳам тўланган. Бинонинг бузилиши бўйича тегишли ташкилотларнинг хулосалари мавжуд.
«Дарё» воқеалар ривожини кузатишда давом этади.
Изоҳ (0)