«Пирамида» ва «Билдирсой», меҳмонхона ва фабрикалар: Ўзбекистонда хусусийлаштириладиган объектлар рўйхати янгиланди

Ўзбекистон Давлат активларини бошқариш агентлиги хусусийлаштириладиган корхоналар тўғрисидаги маълумотларни янгилади. Бу ҳақда агентлик матбуот хизматига таяниб, Spot хабар берди.

Биринчи рўйхат июнь бошида, иккинчиси — июлда эълон қилинганди. Ўтган давр мобайнида у деярли уч баробарга ошган — янги рўйхатда 65 та корхона мавжуд.

Рўйхатдан Тошкент вилоятидаги «Чорвоқ» ва «Билдирсой» дам олиш масканлари, Тошкентдаги «Ичанқалъа» меҳмонхона комплекси ва бошқа объектлар ўрин олган.

Нархлар фақат активларнинг бир қисми учун кўрсатилган, кўп ҳолатларда молиявий кўрсаткичлар ҳам келтириб ўтилган — шу орқали корхонанинг даромадлари, активлари ва капиталининг рентабеллиги, фойда кўрсаткичлари ҳақида маълумот олиш мумкин.

Давлат ушбу активларни хусусий бизнесга инвестицияларни жалб қилиш, янги иш ўринлар яратилиш ва бизнесни янада ривожланиши умидида сотмоқда.

Эслатиб ўтамиз, май ойида Тошкентдаги «Ўзбекистон» меҳмонхонасининг давлат улуши Сингапур компаниясига сотилган эди. Август охирларида Тошкентдаги «Чорсу» савдо маркази нархи 30 миллиард сўмга арзонлаштирилиб, қайта сотувга қўйилган.