Қозоғистонлик яккакурашчи Шавкат Раҳмонов UFC’даги дебютини 24 октябрь куни Абу-Даби (БАА) шаҳридаги «Жангчилар оролида» ўтказиладиган UFC 254 мусобақасида ўтказади.
MMA Fighting хабарига кўра, унинг UFC’даги илк рақиби 33 ёшли тажрибали бразилиялик Elizeу Залески дос Сантос бўлади.
Таъкидлаш жоиз, Шавкат аслида UFC’даги дебютини март ойида ўтказиши керак эди. Бироқ коронавирус пандемияси туфайли унинг иштирокидаги жанг қолдирилганди.
25 ёшли Раҳмонов UFC тарихига илк қозоғистонлик спортчи сифатида киради. У MMA’даги фаолияти давомида 12 та жанг ўтказиб, уларнинг барчасида ғалаба қозонган. Саккизта жангда нокаут эвазига рақибларини таслим қилган. Дос Сантос эса UFC’да 2015 йилдан бери ҳаракат қилади. Шу вақт мобайнида у 11 та жанг ўтказиб, шуларнинг 8 тасида ғалаба қозонган, 3 тасида имкониятни бой бериб қўйган.
Маълумот учун, Шавкат Раҳмонов 1994 йил 23 октябрда Сурхондарё вилоятининг Шўрчи шаҳрида туғилган. У 2011 йил Қозоғистонга кўчиб борган. Аввал Туркистон, Қарағанда вилоятларида истиқомат қилган. Сўнгра Кўкчатауга кўчиб, «Кўкча» академиясида таълим олган. MMA’га қадар бокс, самбо ҳамда жиу-жицу билан шуғулланган. 2014 йилда эса MMA’да илк жангини ўтказган.
UFC 254 кечасининг асосий воқеаси Ҳабиб Нурмагомедов ва Жастин Гэтжи ўртасидаги чемпионлик жанги бўлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)