Нурмат Отабеков: Кўз шиллиқ пардасининг яллиғланиши коронавируснинг белгиларидан бири бўлиши мумкин

Конюнктивит яни кўз шиллиқ пардасининг яллиғланиши коронавирус касаллигининг белгиларидан бири бўлиши мумкин. Бу ҳақда Вазирлар Маҳкамаси ҳузуридаги Санитария-эпидемиологик назорат давлат инспекцияси бошлиғи Нурмат Отабеков маълум қилган.

Жумладан, мутахассис АОКА ҳузуридаги штабга келиб тушган «Ҳозирда короновирусдан даволанмоқдаман. Бу даврда кўзим тез тез ёшланмоқда. Шундай ҳолат ҳам кузатиладими? Кўз билан боғлиқ касалликларим йўқ эди», деган саволга изоҳ бериб ўтган.

Тадқиқотчи олимларнинг аниқлашича, конюнктивит яни кўз шиллиқ пардасининг яллиғланиши коронавирус касаллигининг белгиларидан бири бўлиши мумкин. Коронавирус бурун шиллиқ қаватида аниқланишдан бир ҳафта ўтганидан кейин кўз шиллиқ қаватида аниқланишини италялик олимлар ўзларининг тадқиқотларида аниқлашган, шунинг учун коронавирус билан ишлаётган шифокорларни нафақат бурун ва оғиз, кўзларни ҳам ҳимоя қилиш ҳақида огоҳлантиришган. Хитойлик шифокорларининг тажрибасида ҳам коронавирус билан даволанаётган беморларнинг 1 фоиз ҳолатда конюнктивит аниқланган.

Нурмат Отабеков, Республика махсус комиссияси ва Коронавирусга қарши кураш штаби аъзоси, профессор

Эслатиб ўтамиз, аввалроқ Коронавирусга қарши кураш штаби аъзоси Наргиза Нуруллаева коронавируснинг энг кўп учрайдиган белгиларини фоизлар нисбатида маълум қилган, вируснинг бошқа шамоллаш ва ўткир респиратор касалликлардан фарқли бўлган жиҳатлари, энг эрта пайдо бўладиган аломати айтилган эди. Коронавирусга қарши кураш штабининг яна бир аъзоси Барно Абдусаматова эса коронавирус инфекцияси турли шаклларда ўтиши ва доим ҳам ўпкага зарар етказмаслигини айтганди. Шунингдек, у касаллик кўп ҳолларда умуман симптомларсиз кечиши, яъни тест натижаси мусбат бўлса-да, киши ҳеч қандай аломатларни сезмаслиги ва бундай вирус ташувчиси текширилганда организмда ҳеч қандай ўзгариш аниқланмаслигини билдирган.