Вазирлар Маҳкамаси қарори билан Ўзбекистон Ёшлар ишлари агентлиги тўғрисидаги низом тасдиқланди. Адлия вазирлиги низомдаги муҳим жиҳатларни санаб ўтди.
Низомга кўра, агентликнинг қабул қилган қарорлари давлат органлари, бошқа ташкилот ва уларнинг мансабдор шахслари, шунингдек, фуқаролар учун бажарилиши мажбурий ҳисобланади.
Агентлик юридик шахс ҳисобланиб, ўз номи ёзилган ва давлат герби тасвири туширилган муҳр ва бланкаларга, мустақил балансга, шахсий ғазна ва банк ҳисоб варақларига эга бўлади.
Агентлик тизимига агентликнинг марказий аппарати, ҳудудий бўлинмалари, Ёшлар муаммоларини ўрганиш ва истиқболли кадрларни тайёрлаш институти, «Ёшлар медиа холдинги» АЖ киради. Ҳудудий бўлинмалар (туманлар ва шаҳарлар бўлимлари бундан мустасно) юридик шахс ташкил этган ҳолда фаолият юритади.
Агентликнинг асосий вазифаларидан бири – ёшлар билан боғлиқ соҳа ва йўналишларда ягона давлат сиёсатини, стратегик йўналишлар ва давлат дастурларини ишлаб чиқиш ва амалга ошириш ҳисобланади.
Маълумот учун, Ёшлар ишлари агентлиги 2020 йил 30 июнда ташкил этилган. Унга Алишер Саъдуллаев директор этиб тайинланган.
Изоҳ (0)