Фарғона вилояти Ўзбекистонда кўтарилган пиёдалар ўтиш жойини оммавий равишда жорий этадиган илк вилоятга айланиши мумкин. Бу каби оддий ва арзон амалиёт бутун дунёда ўнлаб йиллардан буён қўлланиб келинади ва у кўплаб инсонлар ҳаётини сақлаб қолишга хизмат қилади, деб ёзади «Gazeta.uz».
Фарғона вилояти Ички ишлар бошқармаси вилоят ҳокимлиги билан ҳамкорликда пиёдалар ўтиш жойларида одамлар хавфсизлигини таъминлаш мақсадида ўтиш жойи баландлигини бироз кўтариш бўйича лойиҳани бошлади.
Бундан ташқари, кўтарилган пиёдалар ўтиш жойларига «Мактаб» ва «30» белгилари жойлаштирилган.
Вилоят ИИБ раҳбари Дониёр Тошхўжаевнинг маълум қилишича, Фарғонада бир куннинг ўзида 10 та пиёдалар ўтиш жойи кўтарилган.
«Учта пиёдалар ўтиш жойида ишларни якунладик, лойиҳа 10 та жойни ўз ичига олган бўлиб, биз уларни бугуннинг ўзида якунлаймиз. Вилоят ҳокими қўнғироқ қилиб, бунга кетаётган харажатни ҳисоблашни сўради ва пиёдалар ҳамда кўчма светофорлар учун қанча маблағ зарур бўлса, шунча ажратишга ваъда берди», — дейди Тошхўжаев.
ИИБ раҳбарининг сўзларига кўра, кўтарилган пиёдалар ўтиш жойини қуриш амалиётини бутун вилоятга татбиқ этиш режалаштирилмоқда. Улар мактаблар, олийгоҳлар, болалар боғчаси, бозорлар ва интенсив ҳаракат кузатиладиган бошқа объектлар жойлашган кўчаларда пайдо бўлиши керак. Магистрал кўчаларда эса бу каби пиёдалар йўлагини жорий этиш режалаштирилмаган.
Вилоят расмийлари, шунингдек, олий таълим муассасалари ва мактаблар қаршисига ўрнатиладиган, зарур ҳолатда ЙПХ инспекторининг ўринини босувчи кўчма светофорлар сонини ошириш ниятида.
«Тўғрисини айтганда, Фарғонага келганимда ҳайдовчилар пиёдаларга умуман йўл бермаслигини кўриб, қўрқиб кетганман. Ҳатто бу борада бир неча матбуот анжумани ҳам ўтказганман. Шундан сўнг биз бунга қарши кураш бошладик, бироқ бунга чора топиш керак эди. Дастлаб пиёдалар ўтиш йўлига яқинлашаётган машиналар тезлигини камайтириш учун сунъий нотекисликлар ўрнатиш ғояси пайдо бўлди. Кейин интернет орқали муаммони ўрганиб, кўтарилган пиёдалар йўлаги вариантини танлашга қарор қилдим», — дейди Дониёр Тошхўжаев.
Таъкидланишича, бу каби кўтарилган пиёдалар ўтиш йўли ўрнатилмайдиган магистрал йўлларга Hikvision камералари ўрнатилади. Улар пиёдаларга йўл бермайдиган ҳайдовчиларни қайд этиб, автоматик равишда уларга жарима юборади.
Қумтепа бозори қаршисида ерости ёки ерусти ўтиш жойини қуриш режалаштирилган, натижада мобил светофорли кенг «зебра» чизишга қарор қилинган.
«Японияда бўлганимда шу каби улкан, кенг пиёдалар ўтиш йўлагини кўргандим», — дейди вилояти ИИБ раҳбари.
Изоҳ (0)