12 сентябрь куни 837 нафар ўзбекистонлик Ростов вилоятидан, шунингдек, Екатеринбургдан 800 нафарга яқин фуқаро поезд орқали Тошкент томон йўлга чиқди.
Ростовдаги ўзбекистонлик муҳожирларнинг аксарияти поезд орқали жўнаб кетди
Каменск-Шахтинск шаҳри раҳбари вазифасини бажараётган Александр Срибнийнинг сўзларига кўра, муҳожирлар учун қурилган вақтинчалик лагер у ердаги барча фуқаролар ўз ватанига юборилганидан кейингина ёпилади.
«12 сентябрь куни 930 киши жўнаб кетди. Палатка шаҳарчага 500 киши жойлаштирилди — булар яна қайтиб келганлар ва ўз навбатини кутиб ўтирганлар», — дейди Срибний.
Кейинроқ Ростов вилояти ахборот сиёсати бошқармаси бошлиғи Сергей Тюрин 12 сентябрь куни 837 киши жўнаб кетганини маълум қилган.
«Ёш техниклар» станциясидаги муҳожирлар учун қурилган лагер 9 сентябрь куни очилган. У ерда зудлик билан фавқулодда ҳолат режими жорий этилган. Ўзбекистон фуқаролари август ойидан буён Ростовдаги Первомайск вокзалида поезд кутаётганди, бироқ вилоят расмийлари қарорига кўра, муҳожирларни олиб чиқиб кетадиган поезд энди Каменскдан жўнайди. Ростовдан сўнгги поезд 7 сентябрь куни жўнаб кетган. «Лихая» станциядан навбатдаги поезд қачон жўнашига ойдинлик киритилмаган.
800 га яқин Ўзбекистон фуқароси Екатеринбургни тарк этди
«E1.ru» нашри «Урал—Ўзбекистон дўстлик жамияти» Свердловск вилояти жамоат ташкилотининг раиси Абдиқул Туратовга таяниб ёзишича, 800 нафарга яқин Ўзбекистон фуқароси бўлган поезд 12 сентябрь соат 19:00 да Екатеринбургдан жўнаб кетган.
«Ушбу поезд — янги чартер рейс. Пандемия вақтида бу каби поездлар қатнамади, бироқ ҳозир яна бошлади. Ушбу рейслар Россия ва Ўзбекистон ҳукуматлараро келишувга асосан ташкиллаштирилмоқда. Йўловчилар рўйхати Ўзбекистон бош консуллиги томонидан шакллантириляпти», — дейди Туратов.
Россиядан ҳозирга қадар Ўзбекистонга олиб келинган фуқаролар
Россиядаги ўзбекистонликларни олиб келиш учун 28 августдан бошлаб Екатеринбург, Ростов-Дон, Новосибирск ва Самарага ҳар ҳафта поезд жўнатилиши ҳақида хабар берилганди. Ҳозирга қадар Ростов-Дондан 11 августда 900 дан ортиқ, 13 августда 918 нафар, 23 август 927 нафар фуқаро Ўзбекистонга олиб келинган. 8 сентябрь куни Ўзбекистоннинг яна 940 га яқин фуқароси Ростов-Дондан поездда Тошкентга келтирилиши, яқин орада яна 3 мингга яқин ўзбекистонликни ватанга жўнатиш режалаштирилгани тўғрисида маълум бўлганди.
Бунга қадар Россиянинг Шимолий Кавказ ва Жанубий федерал округларидан 927 нафар, Самара вилоятидан 918 нафар ўзбекистонлик поезд орқали мамлакатга олиб келинган. 9 августда Россиядан поездда олиб келинган 918 нафар ўзбекистонлик Намангандаги карантин зонасига жойлаштирилган. Шунингдек, шу куни бошқа бир поезд Самарадан Самарқандга ўзбекистонликларни олиб келган.
Изоҳ (0)