Австрия канцлери Себастьян Курц мамлакатда коронавирус эпидемиясининг иккинчи тўлқини бошланганини маълум қилди. Бу ҳақда Австрия матбуот агентлиги хабар берди.
Фото: Getty Images
«Ҳозирда бошимиздан ўтказаётганимиз — иккинчи тўлқиннинг бошланиши. Касаллар сони ҳар куни ортмоқда», — дейди Курц мамлакат аҳолисига йўллаган мурожаатида.
Канцлернинг сўзларига кўра, Австрияда икки ҳафта олдин кунига 350 нафарга яқин касалликка чалиниш ҳолати қайд этилган бўлса, ҳозирда ушбу кўрсаткич 850 га етган. «Тез орада кунига аниқланаётган янги касаллар сони мингдан ошади», — дейди у.
Курцнинг сўзларига кўра, мамлакатда оғир эпидемиологик ҳолат, айниқса, Венада — касалларнинг қарийб ярми тўғри келаётган мамлакат пойтахтида кузатилмоқда. Курцнинг таъкидлашича, куз ва қиш барча учун бирдек оғир келади.
Канцлер аҳолини санитар хавфсизлик чораларига риоя қилишга чақирган: ижтимоий алоқаларни чеклаш, ҳимоя воситаларини тақиш, ижтимоий масофаланишга риоя қилиш.
Жонс Ҳопкинс университети маълумотларига кўра, Австрияда 13 сентябрь ҳолатида кўра, коронавирус инфекцияси билан касалланганлар сони 33 минг кишидан ошган. Ҳозирга қадар уларнинг 26,7 минг нафари соғайган, 765 киши COVID-19 қурбонига айланган.
Эслатиб ўтамиз, Австрияда COVID-19 билан касалланиш бўйича илк ҳолат 25 февраль куни қайд этилган бўлиб, ўша вақтдаёқ канцлер Себастьян Курц ҳукумат вирус тарқалишининг олдини олиш бўйича барча чораларни кўришини билдирганди. Май бошларига келиб мамлакатда изоляция режими бекор қилинган.
Аввалроқ Туркия ва Украинада ҳам коронавирусга чалиниш ҳолатлари ортгани сабаб карантин чекловлари яна кучайтирилгани тўғрисида хабар берилганди. Арманистонда эса карантин чоралари 11 январга қадар узайтирилган.
