Ўтказилган тадқиқотларда коронавирусга чалиниш хавфининг юқорилиги Д витамини етишмаслиги билан ҳам боғлиқ экани тасдиқланган. Ушбу «қуёш витамини» метаболизм, суяк ва мушаклар ҳолати ҳамда инсон ўзини қандай ҳис қилишида аҳамиятли ҳисобланади. «Домашний очаг» журнали организм учун зарур бўлган Д витамини етишмаслигидан дарак берадиган аломатларга тўхталиб ўтади.
Доимий равишда чарчоқни ҳис қилиш
Агар организмга Д витамини етишмайдиган бўлса, кўп ухлашга қарамай доимий равишда чарчоқ ҳис қилинаверади. Шимолий Американинг тиббиёт фанлари журналида эълон қилинган тадқиқот натижаларига кўра, тез ҳолсизланиш ва сурункали чарчоқ Д витаминининг кам миқдордалиги билан боғлиқ экани маълум бўлган. Шунингдек, ушбу витаминни етарли миқдорда қабул қилганларда ўзини яхши ҳис қилиш ва иш унумдорлиги кузатилган.
Тушкунликка тушиш
Мазкур витамин етишмаслигининг яна бир белгиларидан бири депрессия ҳисобланади. Д витамини етишмайдиган кишилар тез-тез депрессияга тушиши кузатилади. Чунки танада етарли даражада витамин бўлмаган тақдирда, бахт гармони — серотонин ишлаб чиқарилмайди. Сератониннинг камлиги эса кишини меланхолияга бўлган мойиллигини оширади. Американинг Миллий эндокринология жамиятида ўтказилган тадқиқотда беморлар Д витамин қабул қилганидан кейин ўзларини яхши ҳис қилгани ва ҳатто депрессия тарк этгани маълум бўлган.
Доимгидан кўпроқ терлаш
Д витамин етишмаслигининг яна бир классик симптомларидан бири юз ва пешонани доимий равишда тер босиши ҳисобланади. Тана ҳароратингиз меъёрида бўлса ва жисмоний зўриқиш бўлмаса ҳам, пешона ҳўл бўлиши «қуёш витамини» етишмаслигидан далолат беради.
Суяк ва мушакларда оғриқ
Д витамин етишмаслигидан мушак ва суякларда оғриқ пайдо бўлиши билан бирга суякларнинг тез-тез синиши ва чиқиши кузатилади.
Тиниқиб ухламаслик
Journal of Sleep Research нашрида эълон қилинган тадқиқот муаллифларининг хулосасига кўра, етарли даражада Д витаминини қабул қилиш тўлиқ тунги дам олишни 16 фоизга таъминлайди. Агар сизда ҳам уйқу билан боғлиқ муаммолар кузатиладиган бўлса, шифокор билан маслаҳатлашиб Д витамини қабул қилиш тавсия қилинади.
Изоҳ (0)